नवी दिल्ली : जॅकलिन फर्नांडीससोबत चर्चेत आलेला सुकेश चंद्रशेखरला (Sukesh Chandrasekhar) इडीने दुसऱ्यांदा अटक केली आहे. सुकेशने 215 कोटी रुपयांची खंडणी मागितल्या प्रकरणी आरोपी आहे. सध्या त्याला पुन्हा एकदा एका जुन्या प्रकरणामध्ये अटक करण्यात आली आहे. पाच वर्षे जुन्या एका प्रकरणामध्ये त्याला अटक झाली असून AIADMK चे नेते TTV दिनाकरण यांच्याशी निगडीत हे प्रकरण आहे.

ज्या प्रकरणी आता ईडीने सुकेशला अटक केली आहे, ते प्रकरण 2017 चे आहे. या प्रकरणी दिल्ली पोलिसांच्या क्राईम ब्रँचने सुकेशला अटक केली आहे. त्याने AIADMK चे नेते TTV दिनाकरण यांना असा विश्वास दिला होता की तो AIADMK पक्षाला दोन फुले आणि पाने असलेलं निवडणूक चिन्ह मिळवून देईल. याबदल्यानत त्याने त्यांच्याकडून 50 कोटी रुपये मागितले होते. सुकेशने म्हटलं होतं की, हे 50 कोटी रुपये निवडणूक आयोगातील बड्या अधिकाऱ्यांना लाच म्हणून दिले जातील.

यानंतर दिनाकरण यांनी जवळपास दोन कोटी रुपये सुकेशला पाठवले देखील होते. मात्र, दिल्ली पोलिसांना याचा सुगावा लागताच त्यांनी सुकेशला पकडलं त्यानंतर सीबीआयने दिनाकरण यांना देखील याप्रकरणी आरोपी बनवलं. कारण लाच देणं आणि घेणं हे दोन्हीही भारतात अपराध आहे.

गेल्या वर्षी ईडीने त्याला अटक केली होती. सुकेशने एका प्रकरणामध्ये स्वत:ची ओळख गृह मंत्रालय आणि कायदा मंत्रालयाचा अधिकारी असल्याची करवून दिली होती. दिल्लीतील एका व्यापाऱ्याच्या पत्नीकडून 215 कोटी रुपयांची खंडणी उकळल्याच्या आरोपामध्ये त्याला त्यानंतर अटक करण्यात आली होती.

सुकेशने बॉलिवूड अभिनेत्री जॅकलीन फर्नांडीस आणि नोरा फतेहला देखील कोट्यवधी रुपयांचे गिफ्ट्स दिले होते. तसेच आणखी तीन अभिनेत्री भूमी पेडणेकर, सारा अली खान आणि जान्हवी कपूरशी देखील त्याने संपर्क केला होता. सध्या या प्रकरणी त्याला सात दिवसांची कोठडी सुनावण्यात आली आहे.