पालघर - पालघरमधून एक धक्कादायक घटना समोर आली आहे. येथे 17 वर्षीय मुलाने आईचा कुऱ्हाडीने वार करून खून केला. मिळालेल्या माहितीनुसार, आरोपीची आई तिच्या मोबाईलवरून कोणाशी तरी चॅटिंग करत होती. त्याचवेळी मुलाने आईला मॅसेज पाठवताना पाहिले. त्याचा राग अनावर झाल्याने त्याने रविवारी रात्री उशिरा आईवर कुऱ्हाडीने वार करून तिची हत्या केली.

ही घटना वसई शहरातील पारोळे भागातील आहे. या घटनेने परिसरात खळबळ उडाली आहे. शेजाऱ्यांनी सांगितल्यानुसार, माय-लेकात अनेकदा भांडण व्हायचे पण नंतर सगळं नॉर्मल व्हायचं. हा मुलगा असे करू शकेल असे कोणालाच वाटले नव्हते.

पोलिसांनी दिलेल्या माहितीनुसार, ही घटना घडली तेव्हा घरात आई आणि मुलाशिवाय दुसरे कोणी नव्हते. मुलाला आईच्या चारित्र्यावर संशय होता. यावरून त्याचे आईसोबत अनेकदा भांडण होत असे.

मांडवी पोलिचस ठाण्याचे निरीक्षक अशोक कांबळे यांनी सांगितले की, मुलाला त्याच्या ३५ वर्षीय आईच्या चारित्र्यावर संशय होता. यावरून त्यांच्यात वारंवार भांडणे होत होती. रविवारी रात्री मुलगा जेवण करत असताना त्याची आई तिच्या मोबाईलवर कोणाला तरी मेसेज करत असल्याचे त्याने पाहिले. यामुळे तो संतापला.

अधिकाऱ्याने पुढे सांगितले की, मुलाने कुऱ्हाडी काढली आणि कथितपणे आईवर हल्ला केला. त्याने आईवर अनेक वेळा अमानुष हल्ला केला. या हल्ल्यात महिला गंभीर जखमी झाली होती. महिलेला उपचारासाठी भिवंडी येथील इंदिरा गांधी मेमोरियल रुग्णालयात नेले असता डॉक्टरांनी मृत घोषित केले.