पुणे - राज्यातील काही भागांत गेल्या दोन दिवसांपासून पूर्वमोसमी पाऊस पडत आहे. ढगाळ वातावरणामुळे बहुतांश भागात कमाल तापमानात लक्षणीय घट झाली आहे. कोकण वगळता उर्वरित राज्यात पुढील तीन दिवस हवामान कोरडे राहणार असून, तापमानात पुन्हा काहीशी वाढ होण्याची शक्यता हवामान विभागाने वर्तवली आहे.

मराठवाड्यात शनिवारी विजांच्या कडकडाटासह मुसळधार पावसाची नोंद झाली. उर्वरित राज्यातील तुरळक ठिकाणी पावसाच्या हलक्या सरी पडल्या. मात्र, विदर्भात अद्याप तापमानाचा पारा ४० अंशांवर स्थिर आहे. राज्यातील सर्वाधिक कमाल तापमान गोंदिया येथे ४४.५ अंश सेल्सिअस, तर नीचांकी तापमान महाबळेश्‍वर येथे १६.८ अंश सेल्सिअस इतके नोंदले गेले.

पश्‍चिम महाराष्ट्रातील महाबळेश्‍वर, सांगली, कोल्हापूर येते पारा ३० अंशांच्या खाली गेला आहे. मध्य महाराष्ट्रात कमाल तापमानात सरासरीच्या तुलनेत ३ ते ७ अंशांनी घट झाली आहे. विदर्भात बऱ्याच ठिकाणी पारा ४३ अंशांच्या पुढे आहे. मात्र, आता पाऊस कमी होण्याची चिन्हे असून तापमान पुन्हा हळू-हळू वाढण्याची शक्यता आहे. सध्या दक्षिण कर्नाटक आणि परिसरावर सक्रिय असलेल्या चक्राकार वाऱ्यांची स्थिती आंध्र प्रदेशातील रायलसीमाकडे सरकली आहे. त्यामुळे राज्यात हवामान कोरडे होत असून कोकणात मात्र तुरळक भागात पावसाची शक्यता वर्तविण्यात आली आहे.

पुण्यात निरभ्र आकाशाची शक्यता

पुणे - शहर परिसरात ढगाळ वातावरणामुळे कमाल तापमानात चांगलीच घट पाहायला मिळाली. त्यामुळे पुणेकरांचीदेखील उन्हाच्या चटक्यापासून सुटका झाली होती. मात्र, आता परिसरात आकाश निरभ्र राहणार असून कमाल तापमानात पुन्हा वाढ होण्याची शक्यता शनिवारी हवामान विभागाने वर्तविली आहे. शहरात शनिवारी ३४.६ अंश सेल्सिअस, तर लोहगाव येते ३५.४ अंश सेल्सिअस इतक्या कमाल तापमानाची नोंद झाली. गेल्या दोन दिवसांत शहरात ढगाळ वातावरण कायम आहे. शनिवारी, मात्र पुन्हा आकाश निरभ्र झाले होते. हवामान विभागाने दिलेल्या माहितीनुसार येत्या शुक्रवारपर्यंत (ता. २७) परिसरात आकाश निरभ्र राहणार असून अधून-मधून अंशतः ढगाळ वातावरण निर्माण होऊ शकते. त्यामुळे कमाल तापमान पुन्हा ३९ अंशांपर्यंत पोहचण्याची शक्यता आहे.