मुंबई: महाविकास आघाडीतून मावळ मतदारसंघासाठी ठाकरे गट प्रयत्नशील असून, काल ‘मातोश्री’वर झालेल्या आढावा बैठकीत याबाबत चर्चा करण्यात आली. शिरूर मतदारसंघात राष्ट्रवादीचे (शरद पवार गट) अमोल कोल्हे हे खासदार असल्याने मावळ मतदारसंघावर ठाकरे गटाने दावा केला आहे.

मावळचे खासदार श्रीरंग बारणे हे शिंदे गटात गेले असल्याने महायुतीकडून शिंदे गट ही जागा लढवणार असल्याचे निश्चित आहे. मात्र, ठाकरे गटाने या मतदारसंघावर आपला दावा कायम ठेवत मावळ मतदारसंघातील पदाधिकाऱ्यांची ‘मातोश्री’ वर बैठक घेतली. या बैठकीत या जागेवर ठाकरे गटाचा उमेदवार निश्चित करण्याबाबत चर्चा झाली.

आमदार सचिन अहिर यांना याबाबत विचारले असता ते म्हणाले, की मावळ लोकसभा मतदारसंघात ठाकरे गट उमेदवार देणार असून, आमच्या पक्षाचा उमेदवार कोण असेल याचा निर्णय लवकरच होईल. पण ही जागा जिंकून आणण्याबाबतची चर्चा बैठकीत झाली. मावळमधून लढण्यासाठी शिवसेनेत आणि शिवसेनेबाहेरील अनेक लोक इच्छुक आहेत. काही आमच्या संपर्कातदेखील आहेत. त्यासंदर्भात पक्षप्रमुख उद्धव ठाकरे हे स्वतः लवकरच बोलतील.