मुंबई: राज्यातील २१ लोकसभा मतदार संघात ताकद असल्याचा दावा काँग्रेसने केल्यानंतर विदर्भातील चार लोकसभा मतदारसंघात राष्ट्रवादी काँग्रेसची इतर पक्षापेक्षा अधिकची ताकद असल्याचा दावा या मतदारसंघातील स्थानिक नेत्यांनी केला आहे.

‘राष्ट्रवादी’चे अध्यक्ष शरद पवार यांच्या अध्यक्षतेखाली बुधवारी विदर्भातील लोकसभा मतदारसंघाचा आढावा घेतला. यावेळी गडचिरोली, रामटेक, वर्धा आणि अमरावती हे लोकसभा मतदारसंघ राष्ट्रवादी काँग्रेसने स्वत:कडे घ्यावेत अशी आग्रही भूमिका स्थानिक नेत्यांनी मांडल्याचे समजते.

अमरावती लोकसभेत नवनीत राणा या खासदार असल्या तरी त्यांना ‘राष्ट्रवादी’ने पुरस्कृत केले होते. त्यामुळे अमरावती लोकसभेची जागा राष्ट्रवादी काँग्रेसचीच आहे.

पक्षाने पुरस्कृत केलेला उमेदवार या मतदारसंघात विजयी झाला असल्याने अमरावती लोकसभा राष्ट्रवादी काँग्रेसलाच मिळायला हवा, अशी आग्रही भूमिका स्थानिक नेत्यांनी शरद पवार यांच्यासमोर मांडली. ही माहिती प्रदेशाध्यक्ष जयंत पाटील यांनी दिली.

ज्या लोकसभा मतदारसंघांमध्ये राष्ट्रवादी काँग्रेसची ताकद आहे, त्या मतदारसंघाचा आढावा पक्ष घेत असल्याची माहिती जयंत पाटील यांनी दिली.

काँग्रेसकडून रामटेक घ्या

रामटेक लोकसभा मतदारसंघात काँग्रेसला सलग दोन वेळा अपयश आले. त्यामुळे ही जागा ‘राष्ट्रवादी’ने लढवावी अशी मागणी पक्षाच्या बैठकीत करण्यात आली. वर्धा आणि गडचिरोली या लोकसभा मतरदारसंघात पक्षाला संधी मिळावी, अशी आग्रही भूमिका या बैठकीत मांडल्याची माहिती सूत्रांनी दिली.