मुंबई - लोकसभा निवडणुकीत भारतीय जनता पक्षाला शह देण्यासाठी विरोधकांनी इंडिया नावाची आघाडी स्थापन केली. राज्यात महाविकास आघाडीच्या वतीने राज्यात तयारी सुरू करण्यात आली असून जागांसाठी रस्सीखेच सुरू झाली आहे. ठाकरे गटाच्या शिवसेनेने मुंबईतील लोकसभेच्या चार जागांवर दावा केला आहे.

उद्धव ठाकरे गट मुंबईच्या सहा पैकी चार जागा लढण्यासाठी आग्रही आहे. त्यासाठी चार जागांवर दावा केला आहे. तर एक काँग्रेसला आणि एक राष्ट्रवादी काँग्रेसला देण्याची ठाकरे गटाच्या नेत्यांची भूमिका आहे.

दक्षिण मुंबई, दक्षिण मध्य मुंबई, उत्तर पश्चिम मुंबई आणि ईशान्य मुंबई या चार जागांवर ठाकरे गट आग्रही आहे. याशिवाय ठाणे, कल्याण-डोंबिवली, पालघर आणि भिवंडीसाठी देखील ठाकरे गट उत्सुक असल्याचं सांगण्यात येत आहे.

दक्षिण मुंबई लोकसभा मतदारसंघासाठी अरविंद सावंत यांचं नाव निश्चित करण्यात आलं आहे. तर दक्षिण मध्य मुंबईचे खासदार राहुल शेवाळे हे शिंदे गटात गेल्याने त्यांना पराभूत करण्यासाठी ठाकरे गट आक्रमक आहे.

तसेच उत्तर पश्चिम मुंबई लोकसभेसाठी विद्यमान खासदार गजानन कीर्तिकर हे शिंदे गटात गेल्याने ठाकरे गटाने त्यांचे चिरंजीव अमोल कीर्तिकर यांना उमेदवारी देण्याचं ठरवलं आहे. तर ईशान्य मुंबई लोकसभेचे विद्यमान खासदार हे भाजपचे मनोज कोटक आहेत. ईशान्य मुंबई लोकसभेसाठी अद्याप ठाकरे गटाकडून नाव निश्चित करण्यात आलेलं नाही.