मुंबई: आज 'मार्मिक'चा ६१ वा वर्धापनदिन आहे. यानिमित्त शिवसेनाप्रमुख उद्धव ठाकरे शिवसैनिकांशी संवाद साधत आहेत. या वर्धापनदिनानिमित्त त्यांनी शिवसैनिकांना सदिच्छा दिल्या आहेत. यावेळी उद्धव ठाकरे यांनी म्हटलंय की, मार्मिक आता नव्या रुपात उपलब्ध झाला आहे, मात्र, मार्मिकच्या वाटचालीत सर्व शिवसैनिकांचा सहभाग आहे. मार्मिकनेच खऱ्या अर्थाने वाटचाल आखून दिली आहे. लढण्यासाठी प्रेरणा दिली. फ्री प्रेस जर्नलमधील नोकरी सोडून बाळासाहेबांनी मार्मिक हे स्वत:चं साप्ताहिक सुरु केलं. हा विचारच मुळात धाडसाचा होता. व्यंगचित्र साप्ताहिक सुरु करणं आव्हानात्मक होतं. आता मार्मिक ६१ वर्षांचा झाला आहे. तो नक्कीच शतायुषी होईल. मार्मिक ही मशाल आहे.

पुढे त्यांनी म्हटलंय की, या साप्ताहिकामागे मराठी माणसांच्या आयुष्यामध्ये थोडा विरंगुळ्याचा क्षण यावा हा सुरुवातीचा विचार होता. मात्र, नंतर या मनोरंजनाची जागा मनोव्यथेने घेतली. त्यातूनच शिवसेनेचा जन्म झाला. ही मोठी चळवळ या साप्ताहिकाने सुरु केली. शिवसेना ही एकमेव संघटना जीची स्थापना एका व्यंगचित्रकाराने केली आहे. व्यंगचित्र म्हणजे वेड्यावाकड्या रेघोट्या नव्हेत. व्यंग काढायचं म्हणून काढणं व्यंगचित्र नव्हे, असंही त्यांनी म्हटलंय.