मुंबईः मागच्या काही दिवसांपासून उपमुख्यमंत्री देवेंद्र फडणवीस आणि शिंदे गटाकडून उद्धव ठाकरेंवर टीका केली जात आहे. उद्धव ठाकरेंनी मात्र काही उत्तर दिलेलं नव्हतं. आता यू ट्यूब चॅनेलच्या माध्यमातून उद्धव ठाकरे सगळ्या आरोपांना उत्तर देणार आहे.

येत्या २६ जुलै आणि २७ जुलै या दोन दिवशी दोन भागांमध्ये उद्धव ठाकरेंची मुलाखत प्रसिद्ध होणार आहे. ठाकरे गटाचे खासदार संजय राऊत हे उद्धव ठाकरेंची मुलाखत घेतील. या मुलाखतीचा प्रोमो आज प्रसारित करण्यात आलेला आहे. यामध्ये उद्धव ठाकरे रोखठोकपणे उत्तर देतांना दिसत आहेत.

'प्रोमो'मध्ये संजय राऊत विचारतात- वर्षभरापूर्वी अशाच मुसळधार पावसामुळे तुमच्या नेतृत्वाखालील सरकार वाहून गेलं... त्याला उत्तर देतांना उद्धव ठाकरे म्हणाले की, सरकार वाहून नव्हतं गेलं, खेकड्याने धरण फोडलेलं आहे. असं म्हणून उद्धव ठाकरेंनी एकनाथ शिंदेंवर जोरदार प्रहार केला.

त्यानंतरचा प्रश्न राऊतांनी विचारला. ''फडणवीस असं म्हणतात, उद्धव ठाकरेंनी पाठीत खंजित खुपसला...'' त्यावर उद्धव ठाकरे म्हणाले, मग राष्ट्रवादीने काय खुपसलं होतं, जेणंकरुन तुम्ही राष्ट्रवादी तोडली. रोज उठसुट दिल्लीला मुजरा मार, ही आपली संस्कृती नाहीये. त्यांना मला संपवण्यात आनंद मिळत असेल तर संपवा.. बघूया जनता कुणासोबत आहे.

उद्धव ठाकरेंची ही मुलाखत वादळी होणार असं दिसतंय. मागच्या काही दिवसांपासून त्यांच्यावर होत असलेल्या आरोपांना ठाकरेंनी या मुलाखतीमधून उत्तर दिलं आहे. विशेषतः एकनाथ शिंदे, देवेंद्र फडणवीस आणि विरोधकांच्या आघाडीवर ठाकरे काय बोलतात, याकडे सर्वांचं लक्ष लागून राहिलं आहे.