नवी दिल्ली : माजी मुख्यमंत्री उद्धव ठाकरे यांच्या तीन दिवसांच्या दिल्ली दौऱ्याने काँग्रेसश्रेष्ठींसोबत असलेले शिवसेनेच्या ठाकरे यांच्या पक्षाचे संबंध अधिक घट्ट असल्याचे दिसून आले. उद्धव ठाकरे भाजपपेक्षा काँग्रेससोबत अधिक सहज असल्याचे या दौऱ्याने स्पष्ट झाले आहे. इंडिया आघाडीच्या नेत्यांनी उद्धव ठाकरे यांच्या दिल्लीत भेटी घेतल्याने शिवसेना व इंडिया आघाडीतील नेते यांचा एकमेकांमध्ये चांगला समन्वय असल्याचे दाखवून देण्यात आघाडी यशस्वी झाली आहे.

दिल्लीत येण्यास फारसे उत्सुक राहत नसलेले उद्धव ठाकरे यांनी तब्बल तीन दिवस मुक्काम केला. या काळात काँग्रेसचे अध्यक्ष मल्लिकार्जुन खर्गे, लोकसभेतील विरोधी पक्षनेते राहुल गांधी यांची महाराष्ट्रातील निवडणुकीच्या संदर्भात सखोल चर्चा केली.

निवडणुकीसाठी जागावाटप

• तसेच प्रचाराचे मुद्दे व निवडणुकीची रणनीती काय राहील, यासंदर्भात

• ही चर्चा प्रामुख्याने होती. उद्धव ठाकरे यांनी गुरुवारी काँग्रेस संसदीय दलाच्या नेत्या सोनिया गांधी यांचीही

• सदिच्छा भेट घेतली. यावेळी रश्मी ठाकरे व आदित्य ठाकरे सुद्धा उपस्थित होते.

• काँग्रेसश्रेष्ठींशी ठाकरे यांच्या सविस्तर भेटी झाल्याने काँग्रेस व शिवसेना उद्धव बाळासाहेब ठाकरे पक्षाचे संबंध अधिक घट्ट झाल्याचे बोलले जात आहे.

• दिल्लीचे मुख्यमंत्री अरविंद केजरीवाल यांच्या पत्नी सुनीता केजरीवाल यांची सुद्धा ठाकरे यांनी सदिच्छा भेट घेतली.

• यावेळी आपचे खासदार संजयसिंह, राघव चढ्ढा व खासदार संजय राऊत उपस्थित होते.

उपराष्ट्रपतींकडे दीड तास

उद्धव ठाकरे यांनी उपराष्ट्रपती जगदीप धनकड यांची त्यांच्या नव्या निवासस्थानी भेट घेतली. यावेळी रश्मी ठाकरे व आदित्य ठाकरे सुद्धा उपस्थित होते. उपराष्ट्रपती धनकड यांना काही महिन्यांपूर्वीच नवे निवासस्थान मिळाले आहे. ही नवी वास्तूही ठाकरे यांना दाखविण्यात आली. तसेच धनकड व ठाकरे यांनी विविध विषयांवर चर्चा केली. ठाकरे कुटुंबिय जवळपास दीड तास उपराष्ट्रपतींच्या निवासस्थानी होते.