ओबीसींची ओबीसींची जातनिहाय मोजणी करण्यात यावी या मागणीसाठी आज वंचित बहुजन आघाडी आक्रमक झाली आहे. मुंबईतील आझाद मैदान येथे आज वंचित बहुजन आघाडीने आंदोलन केले आहे. प्रकाश आंबेडकर यांच्या नेतृत्वाखाली हो मोर्चा काढण्यात आला. यावेळी वंचितच्या कार्यकर्ते आणि पोलिस आमनेसामने आल्याने पोलिसांनी कार्यकर्त्यांना ताब्यात घेतलं आहे. यावेळी प्रकाश आंबेडकर यांनी आमचं आंदोलन शांततेत सुरु असल्याचं स्पष्ट केलं आहे.

यावेळी प्रकाश आंबेडकर म्हणाले, या शासनानं ओबीसी आरक्षणाचं फिडिंग केलं नाही. यामुळ ओबीसी आरक्षण धोक्यात आलं आहे. सरकारनं ओबीसी आरक्षणाची योग्य पद्धतीनं बाजू मांडेलेली नाही. यासाठी जी ४५० कोटीची तरतूद केली आहे, तसा कायदा नाही. अधिवेशन सुरु आहे. यात सेन्सस करणारा कायदा केला पाहिजे. तो कायदा करून सेन्सस कमिशनकडे हे पैसे वळवले तर सेन्सस सुद्धा ओबीसीची जातनिहाय संख्या देऊन सर्वोच्च न्यायालयात ते सादर करु शकते. परंतु शासनाचा हेतु खोटा आहे. ज्या पद्धतीने त्यांनी मराठ्यांच आरक्षण संपवलं तसंच ते ओबीसींचं आरक्षणही संपुष्टात आणणार आहेत. आंदोलन सुरु ठेवणार आहात का ? या प्रश्नावर ते म्हणाले, आंदोलन करणे हा आमचा अधिकार आहे, आम्ही ते करणार. हे आंदोलन शांततेत करत आहोत, ते सुरु राहणार आहे. मात्र पोलिसांनी आंदोलकांना ताब्यात घेतलं आहे. तरीही आंदोलन सुरु राहणार आहे, असं त्यांनी सांगितलं आहे.