मुंबई : गृहमंत्री देवेंद्र फडणवीस यांच्या मदतीनं चित्रा वाघ यांनी माझ्या सुनेला माझ्याविरोधात भडकवलं, असा सनसनाटी आरोप विद्या चव्हाण यांनी केला आहे. पत्रकार परिषदेत बोलताना त्यांनी आपली सून आणि चित्रा वाघ यांच्यातील संभाषणाची ऑडिओ क्लीप ऐकवली. कालच विद्या चव्हाण यांनी आपण उद्या पेन ड्राईव्ह बॉम्ब टाकणार असल्याचं म्हटलं होतं.

विद्या चव्हाण म्हणाल्या, "माझ्या घरगुती प्रकरणाचा यांनी राजकारणासाठी वापर केला. महाले, अळवणी, मनिषा चौधरी यांच्यामार्फत राजकारण केलं गेलं. मी फडणवीस यांना भेटून सांगितलं या‌ न्यायालयीन प्रकरणात येऊ नका, पण त्यांनी हे केलं.

माझ्यावर ईडी, आयटीची धाडी टाकता येत नाही. मला अटक करता येत नाही. मी बेरोजागरी, महागाईविरोधात बोलते म्हणून मला असा त्रास दिला जात आहे. भाजपनं माफी मागितली पाहिजे. चित्रा वाघ यांनी लक्षात ठेवावं हे त्यांच्या घरातही होऊ शकतं. भाजपच्या वरिष्ठ नेतृत्वानं याची दखल घ्यावी, अशी मागणीही यावेळी विद्या चव्हाण यांनी केली.

विद्या चव्हाण यांनी ऑडिओ क्लीप ऐकवल्यानंतर चित्रा वाघ यांनी तातडीनं पत्रकार परिषद घेत विद्या चव्हाणांनी सुनेवर कसा अन्याय केला हे सांगितलं. पण त्यांचा हा दावा खोटा असल्याचं सांगत विद्या चव्हाण यांनी म्हटलं की, "चित्रा वाघ धडधडीत खोटं बोलत आहेत. त्यांनी माझ्याशी चर्चा करावी माझ्या सुनेला घेऊन यावं. माझ्या घरचा पत्ता तिला माहिती आहे. ती चुकीची माहिती देत आहे. कोर्टानं सांगितलेलं आहे की कौटुंबिक हिंसाचाऱ्यांची घटना नाही,"