‘भाजपच्या सर्व नेतेमंडळींना माझी विनंती आहे की, आपण सर्व सर्व्हे पाहिलेले आहेत. जर मुख्यमंत्री एकनाथ शिंदे तुमच्याबरोबर नसतील तर काय होईल याचा विचार आपण करावा आणि आपल्या वर्तनामध्ये सुधारणा करावी. आम्ही तुमच्याबरोबर आहोत आम्हाला गोडीत समजून घ्या. आमचीही चार कामे करा. हवेत उडण्याचे बंद करा. आपण एकटेच सत्तेत असल्याचा आविर्भाव सोडा. सर्व मित्रपक्षांना एकत्र घेऊन काम करा...’ या व्हिडिओमुळे राजकीय वर्तुळात चर्चा रंगली असून, शिवसेना- भाजप युतीतील मतभेद चव्हाट्यावर आले आहे.(Latest Marathi News)

महाराष्ट्राचे मुख्यमंत्री एकनाथ शिंदे यांना असहकार करण्याचा ठराव कल्याण येथील भाजपने केला असून, या ठरावाचा निषेध माढा लोकसभा मतदार संघाचे शिवसेना संपर्कप्रमुख संजय कोकाटे यांनी सोशल मीडियावर व्हिडिओद्वारे केला आहे. एवढेच नव्हे तर सोलापूर जिल्ह्यात भाजप हा शिवसेना कार्यकर्त्यांवर करीत असलेल्या अन्यायाचा पाढाच वाचला आहे. त्यामुळे भाजप- शिवसेना युतीतील धुसफूस उघड झाली आहे.(Marathi Tajya Batmya)

यासंदर्भात संपर्कप्रमुख संजय कोकाटे यांनी सोशम मीडियावर व्हिडिओ क्लिप प्रसारित केली असून, त्यामध्ये मुख्यमंत्री एकनाथ शिंदे यांच्यामुळेच भाजप सत्तेत आहे, हे लक्षात ठेवले पाहिजे. सोलापूर जिल्ह्यामध्ये सुद्धा आम्ही भाजपचा खूप अन्याय सहन करतो. सोलापूरचे पालकमंत्री राधाकृष्ण विखे-पाटील हे वेळ देत नाहीत. (Marathi Tajya Batmya)

संजय गांधी निराधार सारख्या कमिट्या झालेल्या नाहीत. आमची कुठली कामं होत नाहीत. फक्त भाजपचे काम करा, असा अलिखित आदेश प्रशासनाला दिलेला आहे. माढा लोकसभेमध्ये आम्ही जीवाचे रान करून आमच्यावर २५-३० वर्षे अन्याय झाला तरीही आम्ही भाजपचा खासदार निवडून दिला. परंतु भाजपच्या अंतर्गत गटबाजीमुळे आम्ही ज्यांचा विरोध पत्करून काम केलं, त्याच मंडळींना बरोबर घेतले जात आहे. त्यांना ताकद दिली जाते, असा आरोपही संजय कोकाटे यांनी केला.(Latest Marathi News)

‘भविष्यात आमच्या मदतीची अपेक्षा करू नका...’

उद्या कदाचित भाजपची अंतर्गत भांडणं मिटतील, परंतु शिवसेना, मित्रपक्ष येणाऱ्या काळामध्ये भाजपच्या उमेदवाराचा खासदारकीला प्रचार करतील असे मला वाटत नाही. आम्हाला काही अपेक्षा नाही. कुठलेही काम आमचं झालेले नाही. (Latest Marathi News)

साध्या पत्रासाठी सुद्धा आम्हाला दहा दहा वेळा फोन करावे लागतात. तरीही आमची तक्रार नाही. ज्यांच्यासाठी आम्ही रक्ताचं पाणी केलं तीच मंडळी त्या विरोधकांना बरोबर घेऊन फिरणार असाल तर भविष्यामध्ये आमच्या मदतीची अपेक्षा करू नका, असा इशारा संजय कोकाटे यांनी दिला.(Marathi Tajya Batmya)