मुंबई : राष्ट्रवादी काँग्रेसचे आमदार अजित पवार यांनी बंड केल्यानं आता राज्याच्या राजकारणात नवी खेळी सुरु होत आहे. अजित पवार हे राजभवनात दाखल झाले आहेत. पण ते मुख्यमंत्रीपदाची शपथ घेणार असल्याची चर्चाही सुरु झाली आहे. कारण राष्ट्रवादीचे आमदार अमोल मिटकरी यांनी तसं विधान केलं आहे. त्यामुळं मोठी खळबळ उडाली आहे.

राज भवनात उपस्थित अमोल मिटकरी म्हणाले, "अजित दादा म्हणजे पक्ष आहे, पक्ष म्हणजे दादा आहेत. मला खरंच माहिती नव्हतं आम्ही काल एक मिटिंग करुन आलो. सकाळी आम्हाला मिटिंगमध्ये कळलं की आपल्याला सत्तेत सहभागी व्हायचं आहे. अजित दादांनी मुख्यमंत्री व्हावं अस मला वाटतं.

मला असं वाटतं की, मुख्यंमत्रीपदाची शपथ त्यांनी घ्यावी आणि महाराष्ट्राला न्याय देण्याचा आजपर्यंत यांच्याकडून जो प्रयत्न झाला नाही तो प्रयत्न दादांनी करावा. मला विश्वास आहे की अजितदादा मुख्यमंत्री झाल्यानंतरच महाराष्ट्र वळणावर येईल. राज्याला दोन उपमुख्यमंत्री व्हावेत यामध्ये मुख्यंमत्री अजित पवार व्हावेत आणि उपमुख्यमंत्री भाजप आणि शिंदे गटाचा असावा. अजित पवार मुख्यमंत्री व्हावेत अशी मी पांडुरंगाला साकडं घातलं आहे"