Merchant Navy Recruitment Scam: मर्चंट नेव्हीत नोकरीला लावतो, असे आमिष दाखवून तरुणाची ६५ हजार रुपयांची फसवणूक केल्याची तक्रार दापोली पोलिस ठाण्यात दाखल करण्यात आली आहे. उंबर्ले काष्टेवाडी येथील शुभम चंद्रकांत दवंडे (वय २६) असे फसवणूक झालेल्याचे नाव आहे.

याबाबत दापोली पोलिसांनी दिलेल्या माहितीनुसार, शुभम दवंडे हे २०२२ पासून मर्चंट नेव्हीत कार्यरत आहेत.१९ सप्टेंबरला त्यांचे केरळ येथील मित्राने त्यांना फेसबुकवर मर्चंट नेव्हीतील कंपनीत नोकरीसाठी जाहिरात आली असल्याची माहिती दिली. मित्राने शुभमला नोकरीची गरज असल्याचे या कंपनीला कळवले होते. त्यानुसार शुभम याला अर्ज करण्यासाठीचा मेसेज आला. शुभमने भागेश भाग्यम यांच्या मोबाइलवर त्याचे कागदपत्र पाठवले.

त्यानंतर शुभमला कपिला या बोटीवर २२ सप्टेंबरला हजर होण्यास सांगण्यात आले. त्यासाठी मेडिकल प्रमाणपत्र पाठवण्यास सांगण्यात आले. त्यानंतर शुभमला ६५ हजार पाठवण्यासाठी सांगण्यात आल्यावर त्याने सांगितलेल्या खात्यात ६५ हजार रुपये फोन पे द्वारे भरले. त्यानंतर त्या व्यक्तीने शुभमचा मोबाइल क्रमांक ब्लॉक केला.

त्यानंतर शुभमने त्या कंपनीच्या कार्यालयात जाऊन चौकशी केली असता शुभमला करण्यात आलेली मेलचा पत्ता त्या कंपनीचा नसल्याचे सांगण्यात आल्यावर शुभमला आपली फसवणूक झाल्याचे समजताच त्याने भागेश भाग्यम विरोधात काल (ता. १) दापोली पोलिस ठाण्यात तक्रार दाखल केली आहे. अधिक तपास पोलिस निरीक्षक विवेक आहिरे करत आहेत. (Latest Marathi News)