जालंधर : भगवान वाल्मिकींविषयी वादग्रस्त वक्तव्य केल्याने पंजाबी अभिनेता राणा जंग बहादूर यांना जालंधर (Jalandhar) पोलिसांनी अटक केली आहे. त्यांनी एका टीव्हीवरील कार्यक्रमात भगवान वाल्मिकींविषयी (Bhagwan Valmiki) चुकीचा शब्द वापरल्याने धार्मिक भावना दुखवल्याचा आरोप त्यांच्यावर करण्यात आला आहे. एका दिवसापूर्वीच न्यायालयाने त्यांच्या जामीनाची याचिका फेटाळली आहे. जालंधर आणि होशियारपूरमध्ये वाल्मिकी समाजाच्या तीव्र विरोधामुळे त्यांच्यावर नई बारादरी पोलिस ठाण्यात गुन्हा दाखल करण्यात आला. (Actor Rana Jung Bahadur Detains By Jalandhar Police For Bhagwan Valmiki Comment)

वाल्मिकी समाजाने दिला होता बंदचा इशारा

या प्रकरणी काही दिवसांपूर्वीच वाल्मिकी समाजाच्या शिष्टामंडळाने अकाली दल (Akali Dal) नेता चंदन ग्रेवाल यांच्या नेतृत्वाखाली पोलिस आयुक्त गुरशरणसिंह संधू यांची भेट घेऊन राणा जंग बहादूर (Rana Jung Bahadur) यांना अटक करण्याची मागणी केली होती. वाल्मिकी समाजाच्या संघटनांनी अभिनेत्याला १० जुलैपर्यंत अटक न झाल्यास ११ जुलैला जालंधर बंदचा इशारा दिला होता. त्यापूर्वीच त्यांनी बसस्थानकासह अनेक ठिकाणी निषेध करत राणा यांचा पुतळा जाळला होता.

एक महिन्यापूर्वीचे प्रकरण

हे प्रकरण जवळपास एक महिन्यापूर्वीचे आहे. एका टीव्ही चॅनलच्या कार्यक्रमात अभिनेता राणा जंग बहादूर यांनी भगवान वाल्मिकींविषयी वक्तव्य केले होते. वाल्मिकी समाजाच्या संघटनांनी त्यांच्यावर अपशब्द वापरल्याचा आरोप करत त्यांच्याविरुद्ध गुन्हा दाखल करण्याची मागणी केली होती. निदर्शनानंतर जालंधर पोलिसने नई बारादरी ठाण्यात प्रथम माहिती अहवालाची (एफआयआर) नोंद केली होती.