क्रुझवरील ड्रग्ज पार्टीप्रकरणी अभिनेता शाहरुख खानचा Shah Rukh Khan मुलगा आर्यनला Aryan Khan अटक झाल्यापासून बॉलिवूडमधील अनेक स्टारकिड्स चिंतेत असल्याचा दावा स्वयंघोषित चित्रपट समीक्षक कमार आर खानने KRK केला आहे. केआरकेनं ट्विट करत याबद्दलची माहिती दिली आहे. 'अनेक स्टारकिड्स हे देश सोडण्याच्या तयारी असल्याची माहिती माझ्या सूत्रांकडून मिळत आहे', असंही त्याने ट्विटमध्ये म्हटलंय. केआरकेच्या या ट्विटवर नेटकऱ्यांनी संमिश्र प्रतिक्रिया दिल्या आहेत.

काय आहे केआरकेचं ट्विट?

'आर्यन खानच्या प्रकरणानंतर अनेक स्टारकिड्स भारत सोडण्याच्या तयारीत असल्याची माहिती माझ्या सूत्रांकडून मिळत आहे. हे सर्व जर आर्यन खानसोबत घडू शकतं तर कोणासोबतही घडू शकेल, असा विचार ते करत आहेत', असं केआरकेने ट्विटमध्ये म्हटलंय. 'ड्रग्ज घेणाऱ्यांसाठी या देशात जागा नाही', असं काहींनी केआरकेच्या ट्विटवर प्रतिक्रिया देताना म्हटलंय. तर अशा लोकांनी इथे आदराची अपेक्षा करू नये, असंही काहींनी लिहिलंय.

आर्यन खानच्या जामिनाला एनसीबीच्या वतीने विरोध करण्यात आला होता. आर्यनसह पाच जणांनी जामिनासाठी अर्ज केला असून आज (१३ ऑक्टोबर) विशेष एनडीपीएस न्यायालयात त्यावर सुनावणी होणार आहे. आर्यन सह अरबाज खान, मुनमून धनेचा, नुपूर सतेजा आणि मोहक जैस्वाल यांनी जामीन मिळण्यासाठी अर्ज केला आहे. एनसीबीने आर्यनवर एनडीपीएस कायद्याअंतर्गत कलम 8 (क), 20(ब), 27, 28,29, 33 नुसार अमलीपदार्थ बाळगणे, सेवन करणे आणि विकणे असे आरोप लावले आहेत.