Ayushman Khurana: अभिनेता आयुष्मान खुराना सोशल मीडियावर कायम सक्रिय असतो. कधी कुटुंबियांसोबतचे फोटो तर कधी सिनेमाचं प्रमोशन तो सोशल मीडियावर शेअर करत असतो. यासोबतच आयुष्मान त्याच्या खास अंदाजातील शायरी ट्वीटरवर कायम शेअर करतो .

आयुष्मानच्या शायरी नेटकऱ्यांच्या देखील पसंती पडतात. मात्र नुकत्याच शेअर केलेल्या शायरीमुळे आयुष्मानला ट्रोल करण्यात आलं आहे. ट्वीटर म्हणजे तुझी खासगी डायरी नव्हे असं म्हणत एका नेटकऱ्याने आयुष्मानला ट्रोल केलं.

अर्थात या ट्रोलरला आयुष्मानने पुन्हा एकदा त्याच्या मिश्कील अंदाजात उत्तर दिलं आहे.

सोमवारी आयुष्मानने ट्वीटरवर एक शायरी पोस्ट केली. 'कभी मेरी अदा पे हुई दीवानी, कभी लगी उसे मेरे जिस्म की लत और जब हुई तो हुई आयुष्मान उसे मेरे बचपन से मोहब्बत.'

या शायरीसोबत त्याने इंग्रजीमध्ये या शायरीचा सारांशही लिहिला. ज्यात त्याने लिहिलं, ''एखादी स्त्री तुमच्या शरीराकडे पाहून किंवा तुम्ही कसे पुरुष आहात हे पाहून तुमच्याकडे आकर्षित होवू शकते. मात्र प्रेमात पडताना ती तुमच्यात दडलेल्या लहान मुलाच्या प्रेमात पडते''.

हेही वाचा: भारतीय क्रिकेटची नवी आशा- पृथ्वी शाॅ

या शायरीवर एका युजरने एका शायरीच्या माध्यमातूनच प्रतिक्रिया दिली. 'दिल में जो हर बात आए वो शायरी नहीं, ये ट्विटर है आयुष्मान, आपकी पर्सनल डायरी नहीं'असं या युजरने लिहिलं आहे.

या युजरला आयुष्मानने पुन्हा एकदा त्याच्या शायरीनेच उत्तर दिलं आहे. 'मेरी शायरी कभी तुकबंदी तो कभी मेटर में है, जो मजा पर्सनल डायरी में नहीं वो ट्विटर में है.'आयुष्मानने युजरला शायरीच्या माध्यमाने दिलेलं हे उत्तर त्याच्या चाहत्यांना आवडलं आहे.

अनेकांनी त्याचं कौतुक केलंय. तर काही चाहत्यांनी शायरी शेअर करतच आयुष्मानची पाठ थोपटली आहे.

'एक्शन हिरो' या सिनेमानंतर सध्या आयुष्मान 'ड्रीम गर्ल २' या सिनेमाच्या शूटिंगमध्ये व्यस्त आहे. या सिनेमात तो अभिनेत्री विद्या बालनसोबत झळकणार आहे.