गाझियाबाद : भोजपुरी अभिनेत्री आकांक्षा दुबे हिच्या मृत्यू प्रकरणातील (Akanksha Dubey Death Case) मुख्य आरोपी आणि गायक समर सिंह (Singer Samar Singh) याला यूपी पोलिसांनी (UP Police) अटक केलीये.

पोलिसांनी काल रात्री गाझियाबादच्या नंदग्राम पोलीस स्टेशन (Nandgram Police Station) परिसरातून समर सिंहला ताब्यात घेतलं. गाझियाबादचे पोलीस डीसीपी निपुण अग्रवाल यांनी दिलेल्या माहितीनुसार, समर सिंहला चार्म्स क्रिस्टल सोसायटी राजनगर येथून ताब्यात घेतलं.

समर सिंहला अटक करण्यासाठी तयार करण्यात आलेल्या टीमचा भाग असलेले आशापूर चौकीचे प्रभारी अखिलेश वर्मा यांनी सांगितलं की, 'पोलीस स्टेशन नंदग्राम क्षेत्रांतर्गत येतं. समर सिंहला प्रथम गाझियाबाद न्यायालयात हजर केलं जाईल आणि त्यानंतर वाराणसी पोलिसांच्या ताब्यात दिलं जाईल.' सध्या समर सिंहला गाझियाबादच्या नंदग्राम पोलिस ठाण्यात ठेवण्यात आलंय.

भोजपुरी अभिनेत्री आकांक्षा दुबेचा मृतदेह 26 मार्च रोजी सारनाथमधील एका हॉटेलमध्ये पंख्याला लटकलेल्या अवस्थेत आढळून आला होता. या प्रकरणी मृत अभिनेत्रीची आई मधू यांच्या तक्रारीनुसार पोलिसांनी आझमगडचा रहिवासी समर सिंह आणि संजय सिंह यांच्याविरुद्ध कलम 306 आयपीसी अंतर्गत गुन्हा दाखल केला होता. दोन्ही आरोपी सुरुवातीपासून फरार होते, त्यापैकी समर आता पकडला गेलाय.