गानसम्राज्ञी लता मंगेशकर (Lata Mangeshkar) या गेल्या काही दिवसांपासून मुंबईतील एका रुग्णालयामध्ये उपचार घेत आहे. आता त्यांची प्रकृती स्थिर असल्याचे डॉक्टरांनी सांगितलं आहे. मुंबईतील ब्रीच कँडी रुग्णालयामध्ये दीदींना दाखल करण्यात आले होते. आता एएनआयनं केलेल्या व्टिटमध्ये दीदींच्या तब्येतीत सुधारणा झाल्याचे सांगण्यात आले आहे. दोन दिवसांपूर्वी त्यांच्या प्रकृतीत बिघाड झाल्याची बातमी व्हायरल झाली होती. यावेळी मंगेशकर कुटूंबियांच्यावतीनं कोणत्याही प्रकारे चुकीची माहिती पसरवू न देण्याचे आवाहन करण्यात आले होते. काल दीदींनी त्यांच्या व्टिटरवरुन चाहत्यांना आपल्या प्रकृतीविषयी माहिती दिली होती. (Bollywood Singer Lata Mangeshkar health update is improvement)

एएनआयनं दिलेल्या माहितीनुसार दीदींच्या प्रकृतीमध्ये सुधारणा होत आहे. मात्र त्यांना अजूनही आयसीयुमध्ये ठेवण्यात आले आहे. त्या बऱ्या व्हाव्यात यासाठी चाहत्यांना प्रार्थना करण्याचे आवाहन यापूर्वी मंगेशकर कुटूंबियांनी केले होते. डॉ.प्रतीत समदानी हे दीदींवर उपचार करत आहेत. लता मंगेशकर यांच्या प्रकृतीबाबत समाजमाध्यमांवर पसरत असलेल्या अफवांवर कोणीही विश्वास ठेऊ नये. त्यांच्यावर अतिदक्षता विभागात उपचार सुरू आहेत. लता दीदी बऱ्या होऊन घरी येण्यासाठी प्रार्थना करूया असे त्यांच्या निकटवर्तीयांनी कळवले आहे.

लता मंगेशकर यांना ९ जानेवारीला मुंबईतील ब्रीच कँडी रुग्णालयात उपचारासाठी दाखल करण्यात आले आहे. त्यांच्यावर उपचार सुरू असून कोणीही अफवा पसरवू नका असे आवाहन त्यांच्या कुटूंबियांसह डॉक्टरांनीही केले आहे. चाहत्यांनी देखील दींदीच्या आरोग्य़ासाठी प्रार्थना सुरु केली आहे. एका चाहत्यानं तर दीदींच्या उपचारासाठी आपली संपूर्ण बचतठेव दिल्याची बातमी सोशल मीडियावर व्हायरल झाली होती.