हंसल मेहता यांची नवीन वेब सीरिज 'स्कूप' ही सिरिज आज रिलिज झाली आहे. करिश्मा तन्ना या सीरिजमध्ये मुख्य भूमिकेत आहे. मात्र या सिरिज विरोधात छोटा राजन याने कोर्टात याचिका दाखल केली होती.

या वेबसिरिज विरोधात याचिका दाखल करणार्‍या आणि सध्या तुरुंगात बंद गँगस्टर राजेंद्र निकाळजे उर्फ छोटा राजन याला मुंबई उच्च न्यायालयाने शुक्रवारी कोणताही तातडीचा दिलासा देण्यास नकार दिला.

न्यायमूर्ती एस जी डिगे यांच्या खंडपीठाने हंसल मेहता आणि नेटफ्लिक्स एंटरटेनमेंट सर्व्हिसेस इंडियासह सिरिजच्या निर्मात्यांना 7 जूनपर्यंत राजनच्या याचिकेला उत्तर म्हणून प्रतिज्ञापत्र दाखल करण्याचे निर्देश दिले.

तुरुंगात असलेल्या राजनने गुरुवारी वेब सीरिजच्या विरोधात न्यायालयात धाव घेतली होती. यात त्याने म्हटले होते की मालिकेच्या प्रदर्शनावर बंदी घालावी आणि ट्रेलर काढून टाकण्याचे आदेश द्यावेत, अशी विनंती त्यांने न्यायालयाला केली.

त्याने हंसल मेहता आणि नेटफ्लिक्स एंटरटेनमेंट सर्व्हिसेस इंडियासह सिरिजच्या निर्मात्यांना त्याच्या वैयक्तिक अधिकारांचे उल्लंघन करण्यापासून रोखण्यासाठी मनाई आदेशाची मागणी केली.मात्र आता कोर्टानं त्याची याचिका फेटाळली आहे.

ही मालिका प्रदर्शित झाली आहे आणि सर्व सहा भाग उपलब्ध असल्याची माहिती न्यायालयाला देण्यात आली तेव्हा राजनचे वकील मिहिर देसाई म्हणाले की, निर्मात्यांना मालिकेतून त्याचे नाव आणि प्रतिमा काढून टाकण्याचे निर्देश दिले जाऊ शकतात.

न्यायमूर्ती डिगे यांनी मात्र राजन यांना दिलासा देणारा कोणताही आदेश देण्यास नकार दिला. 'सिरिज आधीच रिलीज झाली आहे. सर्व भाग प्रकाशित झाले आहेत. पुढच्या तारखेला बघू. सर्व प्रतिवादींकडून उत्तर प्रतिज्ञापत्र दाखल करू द्या. ७ जून रोजी या प्रकरणाची यादी करा,' असे न्यायालयाने सांगितले.