सध्या बॉलीवूडच्या कुठला मोठा विषय चर्चेत असेल तर ते रणबीर(Ranbir Kapoor)-आलियाचं(Alia Bhatt) लग्न. सगळ्यांना प्रतिक्षा आहे ते या दोघांच्या लग्नसोहळ्यातील सुंदर-सुंदर फोटो पाहण्याची. अर्थात रणबीर-आलियापासून त्यांच्या कुटुंबियांनीही या विवाहसोहळ्याविषयी चुप्पी साधली होती. पण आता सर्वात पहिलं या लग्नाविषयीचं कन्फर्मेशन समोर आलं आहे आणि ते चक्क आलियाचे काका रॉबिन भट्ट (Robin Bhatt) यांनी दिलं आहे. रणबीर-आलिया पुढील आठवड्यात लग्न करत आहेत असं ते म्हणाले आहेत. एका मनोरंजनविषयक बातम्या करणाऱ्या पोर्टलशी बोलताना ते म्हणाले आहेत,''रणबीर-आलियाचा लग्नसोहळा चार दिवस रंगणार आहे. लग्न आर.के हाऊसमध्ये होणार असल्याचंही त्यांनी कन्फर्म केलं आहे''.

रॉबिन यांनी इंडिया टूडेला दिलेल्या माहितीनुसार त्यांना भट्ट कुटुंबियांकडून लग्नाचं निमंत्रण पोहोचलं आहे. रॉबिन भट्ट हे महेश भट्ट आणि मुकेश भट्ट यांचे चुलत भाऊ आहेत. अतिशय मोजक्याच आप्तेष्टांच्या-मित्रपरिवाराच्या उपस्थितीत हे लग्न होणार आहे. रणबीरनं लग्नाआधी बॅचलर पार्टीचंही आयोजन केलं आहे,ज्यात बॉलीवूडमधनही त्याचा काही खास मित्रपरिवार उपस्थित राहणार आहे. यात अयान मुखर्जी,अर्जुन कपूर,आदित्य रॉय कपूर अशी नावं समोर आली आहेत. रणबीर-आलिया बॉलीवूडकरांसाठी खास रीसेप्शन लग्नानंतर ठेवणार आहेत. शाहरुख खान ते करण जोहर आणि आदित्या चोप्रा ते संजय लीला भन्साली ते अगदी रणवीर सिंग अशा सर्वांना रीसेप्शनचं निमंत्रण गेलं आहे. आलिया-रणबीर यांनी एकत्रित काम केलेल्या 'ब्रह्मास्त्र' सिनेमाच्या प्रदर्शनाची देखील चाहते त्यांच्या लग्नाइतकीच चातकासारखी वाट पाहत आहेत.