आपल्या नृत्याच्या माध्यमातून राज्याला परिचित आणि तरुणाईमध्ये क्रेझ असलेली नृत्यांगना गौतमी पाटील हिचे वडील धुळे शहरात बेवारस, मरणासन्नावस्थेत आढळले. त्यांना स्वराज्य फाउंडेशनचे प्रमुख दुर्गेश चव्हाण यांनी हिरे मेडिकल कॉलेजच्या जिल्हा सर्वोपचार रुग्णालयात दाखल केले. चव्हाण यांना संबंधित रुग्ण कोण हे माहीत नव्हते. त्यांनी रुग्णाच्या आधारकार्डव्दाद्वारे सोशल मीडियावर मेसेज व्हायरल केल्यावर ओळख पटू शकली. (dancer gautami patil father found in dhule news)

वडिलांची बातमी गौतमी पर्यंत पोहोचल्यानंतर तिने वडिलांना माणुसकीच्या नात्याने मदत करण्याचा निर्णय घेतला आहे. गौतमी पाटीलच्या वडिलांना आता उपचारासाठी पुण्यात हलवण्यात आले आहे. गौतमीने एका व्हिडीओच्या माध्यमातून आपण वडिलांच्या उपचारासाठी शक्य तितके प्रयत्न करणार असल्याचे म्हटलं आहे.

दोन दिवसांपूर्वी गौतमीचे वडील रविंद्र बाबूराव नेरपगारे पाटील हे धुळ्यात मरणासन्नावस्थेत आढळले होते. धुळ्यातील सामाजिक कार्यकर्त्यांनी त्यांना उपचारासाठी हिरे शासकीय वैद्यकीय रुग्णालयात दाखल केलं होतं. खिशात असलेल्या आधार कार्डवरुन ते गौतमी पाटीलचे वडील असल्याचं समोर आलं होते.

यासंबधीच्या बातम्या समोर आल्यानंतर आपले वडील शासकीय वैद्यकीय महाविद्यालयात उपचार घेत असून प्रकृती गंभीर असल्याचे कळताच गौतमी हिने धुळ्याच्या माजी महापौर जयश्री अहिरराव यांच्याशी संपर्क साधला व त्यांना खाजगी रुग्णालयात उपचारासाठी दाखल करण्यास सांगितले होते.

त्यानंतर गौतमीने पुढाकार घेत वडिलांच्या पुढील उपचारासाठी त्यांना पुण्यात हलवण्यात आले आहे. त्यांच्यावरील उपचार स्वतःच्या देखरेखीत व स्वखर्चाने पुण्यात करणार असल्याचे गौतमीनं स्पष्ट केलं आहे. गौतमी लहानाची मोठी तिच्या मामांकडे झाली.