मुंबई - नागिन फेम अभिनेता पर्ल वी पुरी (pearl v puri)काही दिवसांपासून सोशल (social media) मीडियावर चर्चेत आहे. एका अल्पवयीन मुलीवर अत्याचार केल्याचा आरोप त्याच्यावर करण्यात आला आहे. त्यामुळे त्याच्यावर सोशल मीडियातून मोठ्या प्रमाणात टीका होताना दिसत आहे. याबरोबरच मनोरंजन क्षेत्रातील अनेक सेलिब्रेटी त्याच्या मदतीला आले आहेत. त्यांनी त्याला सपोर्टही केला आहे. पर्लनं दोनवेळा जामीनासाठी अर्ज केला होता. तो अर्ज न्यायालयानं फेटाळला. त्याच्या तिस-या अर्जावर न्यायालयानं जामीन मंजूर केला आहे. (devotees of asaram bapu angry over pearl v puri getting bail post on social media )

जेव्हा पर्लला जामीन मंजूर झाला त्यानंतर आसाराम बापूंच्या भक्तांनी पर्लला ट्रोल करण्यास सुरुवात केली आहे. एका अभिनेत्याला अल्पवयीन मुलीवर अत्याचार केल्याप्रकरणी जामीन मिळाला आहे. तर मग आसाराम बापूंना (asaram bapu) का नाही? असा प्रश्न त्यांनी विचारला आहे. सध्या हा विषय सोशल मीडियावर ट्रेडिंग होताना दिसतो आहे. पर्लला 4 जून रोजी अटक करण्यात आली होती. त्याला 14 दिवसांची न्यायालयीन कोठडी कोर्टानं सुनावली होती. मात्र त्याला अकरा दिवसांनंतर जामीन मिळाला आहे.

एकीकडे पर्लच्या चाहत्यांमध्ये आनंदाचे वातावरण असले तरी आसाराम बापूंच्या भक्तांनी सोशल मीडियाच्या माध्यमातून राग व्यक्त केला आहे. त्यांनी व्टिटरवर वेगवेगळ्या प्रकारे मीम्स शेअर करुन प्रतिक्रिया दिल्या आहेत. त्या पोस्टमध्ये भक्तांनी असे म्हटले आहे, पॉस्को अॅक्टनुसार आसाराम बापूंना गेल्या आठ वर्षांमध्ये एकदाही जामीन मिळालेला नाही. आणि अभिनेता पर्ल पुरीला एवढ्या लवकर जामीन मिळाला. अशा प्रकारे आसाराम बापूंच्या भक्तांच्या पोस्ट व्हायरल झाल्या आहेत.

भक्तांनी आता व्टिटरवर अॅक्टर को बेल संत को जेल नावाचा हॅशटॅगही सुरु केला आहे. पर्ल वर एका अल्पवयीन मुलीवर अत्याचार केल्याचा आरोप आहे. मात्र ज्यांनी त्याच्यावर आरोप केला होता त्या मुलीच्या आईनं काही दिवसांपूर्वी त्या आरोपांचे खंडन केले होते. त्याची पोस्टही सोशल मीडियावर व्हायरल झाली होती.