Sonu Sood: बॉलिवूडमधील प्रसिद्ध अभिनेता सोनू सूदने (Sonu Sood) त्याच्या आगामी 'फतेह' (Fateh) चित्रपटाचं पोस्टर शेअर केलं आहे. सोनूचे चाहते या सिनेमाची उत्सुकतेने वाट बघत आहेत. या दमदार ॲक्शन फिल्ममध्ये जॅकलिन फर्नांडिस (Jacqueline Fernandez) मुख्य भूमिकेत दिसणार असून सोनू सूद या चित्रपटद्वारे दिग्दर्शनात पदार्पण करत आहे. फतेह या चित्रपटाचं पोस्टर नक्कीच खास आहे कारण प्रेक्षकांना काहीतरी नवीन आणि उत्तम गोष्ट बघायला मिळणार यात शंका नाही. सोनू या चित्रपटात वेगळ्या भूमिकेत दिसणार आहे. सायबर क्राइम थ्रिलर कथेवर आधारित असणाऱ्या या चित्रपटाचे लेखन आणि निर्मितीही सोनूने केली आहे.

सायबर क्राईमवर आधारित असणार चित्रपट

शक्ती सागर प्रॉडक्शन आणि झी स्टुडिओज निर्मित हा चित्रपट सायबर क्राईमवर आधारित असणार आहे. या चित्रपटात काही चित्तथरारक ॲक्शन सीक्वेन्स देखील असून जे हॉलिवूड स्टंट तज्ञ ली व्हिटेकर यांच्या देखरेखीखाली पार पडले आहेत. 'फतेह' हा चित्रपट भारत, यूएसए, रशिया आणि पोलंडसह जगभरातील अनेक ठिकाणी शूट झाला आहे.

सोनूनं शेअर केलं पोस्टर

सोनूनं फतेह चित्रपटाचं पोस्टर सोशल मीडियावर शेअर करुन कॅप्शनमध्ये लिहिलं, "कोणालाही कमी लेखू नका!" तसेच सोनूनं चित्रपटाच्या टीझरच्या रिलीज डेटबद्दल देखील कॅप्शनमध्ये लिहिलं आहे. फतेह या चित्रपटाचा टीझर उद्या रिलीज होणार आहे. "फतेहसह पॉवर-पॅक ॲक्शनसाठी सज्ज व्हा", असंही सोनूनं पोस्टरला दिलेल्या कॅप्शनमध्ये लिहिलं आहे.

'फतेह' चित्रपटाबद्दल काय बोलला सोनू?

'फतेह' या चित्रपटाबद्दल बोलताना सोनू सूदने म्हणतो,"फतेह चित्रपटाची कथा अशी आहे ज्याने माझी उत्सुकता वाढवली आणि म्हणून मी हा चित्रपट तयार केला आहे. चित्रपटाचा विषय महत्त्वपूर्ण असून अश्या विषयाकडे प्रेक्षकांनी वेगळ्या नजरेतून बघावं असं मला वाटत".फतेह या वर्षी चित्रपटगृहात प्रदर्शित होणार आहे.

सोनूचे चित्रपट

सोनूनं तमिळ, तेलुगु, हिंदी चित्रपटात काम केलं आहे. त्याच्या मिशन मुंबई,दबंग, सिंबा, हॅप्पी न्यू इअर, शूटआऊट अ‍ॅट वडाला या चित्रपटांना विशेष पसंती मिळाली. आता सोनूच्या 'फतेह' या चित्रपटाची प्रेक्षक उत्सुकतेने वाट बघत आहेत.