साऊथचा सुपरस्टार म्हणून ओळखला जाणारा ज्युनियर एनटीआरचा आज वाढदिवस 38 वा वाढदिवस. त्याच्या वाढदिवसानिमित्त सोशल मीडियावर त्याच्या चाहत्यांनी शुभेच्छांचा वर्षाव केला आहे. एनटीआरच्या वाढदिवसानिमित्त त्याच्याबद्दल काही खास गोष्टी जाणून घेऊयात. ज्युनियर एनटीआरचा जन्म 20 मे 1983 मध्ये हैदराबादमध्ये झाला. त्याचे वडिल नंदमुरी हर‍िकृष्णा हे प्रसिद्ध अभिनेते आणि राजकारणी होते. ज्युनियर एनटीआर हा आंध्र प्रदेशचे माजी मुख्यमंत्री एनटी रामा राव यांचा नातू आहे. त्याने बाल कलाकार म्हणून अभिनय क्षेत्रात पाऊल ठेवले. ‘रामायणम’ या तेलुगू चित्रपटामधून ज्युनिअर एनटीआरने अभिनय क्षेत्रात पाऊल ठेवले. त्यानंतर त्याच्या चित्रपटांमधील अभिनयाने त्याने प्रेक्षकांची मनं जिंकली.

पहिल्या चित्रपटाला मिळालेल्या घवघवीत यशानंतर लगेचच ज्युनिअर एनटीआरने अभिनय क्षेत्रामधून ब्रेक घेतला. त्यानंतर 2001 मध्ये ‘स्टूडेंट नंबर 1’ या चित्रपटामधून त्याने पुन्हा चित्रपटांमध्ये काम करण्यास सुरूवात केली. त्यानंतर ‘सुब्बू’ ‘आदि’ ,'राखी', 'सिम्हाद्री', 'टेंपर', 'प्रेमाथो', 'जनता गैराज' आणि 'बादशाह' यांसारख्या सुपर हिट चित्रपटांमध्ये ज्युनियर एनटीआरने काम केले.

ज्युनिअर एनटीआरला त्याच्या वैयक्तिक आयुष्यात अनेक संकटांना सामोरे जावे लागले. त्यावेळी लक्ष्मी आणि ज्युनिअर एनटीआरची जोडी साऊथच्या चित्रपटांमधील सर्वात लोकप्रिय जोडी होती. हे दोघे लग्न करणार होते, तेव्हा एका वकिलाने ज्युनिअर एनटीआरविरोधात बाल विवाह कायद्याअंतर्गत तक्रार दाखल केली. लक्ष्मी तेव्हा 18 वर्षापेक्षा लहान होती. त्यानंतर ज्युनिअर एनटीआरने लक्ष्मी 18 वर्षांची झाल्यानंतर लग्न केले. 2011 मध्ये दोघे लग्नबंधनात अडकले. त्यावेळी ज्युनिअर एनटीआरच्या वडिलांनी त्याच्या लग्नासाठी तब्बल 18 कोटी रुपये खर्च केले होते. तसेच कलाकारांपासून मोठ मोठ्या मंत्र्यांपर्यंत सर्वांनी लग्नाला हजेरी लावली होती. जवळपास 10,000 लोक या लग्न समारंभात सहभागी झाले होते.

लवकरच ज्युनिअर एनटीआर ‘आरआरआर’ या चित्रपटात महत्वाच्या भूमिकेत दिसणार आहे. या चित्रपटामध्ये आलिया भट्ट, अजय देवगण, राम चरण हे कलाकार देखील महत्वाच्या भूमिकेत दिसणार आहेत. या चित्रपटाचे दिग्दर्शन प्रसिद्ध दिग्दर्शक एस एस राजामौली हे करणार आहेत.