Entertainment News : हेमांगी कवी हे मराठी मनोरंजन विश्वातील एक महत्वाचं नाव. अनेक मालिका, चित्रपट, नाटक तिच्या कसदार अभिनयाने गाजले आहेत. अभिनयासोबतच निरनिराळ्या कारणाने ती चर्चेत असते. विशेष म्हणजे अभिव्यक्तीच्या आधारावर अत्यंत परखडपणे आपले पुरोगामी विचार लोकांपर्यंत पोहचवत असते. त्यामुळे ती कायमच सोशल मीडियावर आपल्याला सक्रिय दिसते. नुकताच तिने एक फोटो इंस्टाग्राम अकाउंट वरून शेअर करत लग्नानंतर आयुष्यात काय बदल झाला याबद्दल सांगितले आहे.

या फोटोमध्ये हेमांगी (hemangi kavi) एका खास वेशभूषेत दिसत आहे. 'कोळी' संस्कृतीत नेसली जाणारी साडी यावेळी तिने परिधान केली आहे. एका डान्स साठी तिने ही वेशभूषा केली होती. पण हा फोटो पोस्ट करताना तिने आपल्या लग्नाच्या आठवणींना उजाळा दिला आहे.

'ही पोळी साजूक तुपातली हिला म्हावऱ्याचा लागलाय नाद!' असे कॅप्शन देत तिने पोस्ट लिहिली आहे. 'लग्नाच्या आधी मी फार कमी, कमी म्हणजे नाहीतच जमा, मांसाहार करायचे, मधली ६ वर्ष तर मी अंड सुद्धा खाल्लं नव्हतं. इतकी vegetarian होते. पण मग पुढे लग्न झालं कोकणातल्या माणसासोबत आणि मग काय हळू हळू मांसाहार वाढत गेला. तेव्हावरील ओळी चपखल आपल्यासाठीच लिहिल्या आहेत असं वाटतं! असं vegetarian to non- vegetarian कोण कोण झालंय सांगा पाहू? बरं ते जाऊदे… आज कालवणास काय केलंय ते सांगा!”, असे तिने म्हटले आहे. हेमांगीच्या या पोस्टवर चाहत्यांनी भन्नाट कमेंट केल्या आहेत. यातील अनेकांनी आपल्या खाण्याच्या आवडीबद्दल सांगितलं आहे.