क्रुझवरील ड्रग्ज पार्टीप्रकरणी मुंबई उच्च न्यायालयाकडून जामीन मंजूर झाल्यानंतर अभिनेता शाहरुख खानचा मुलगा आर्यनची आज (शनिवार) आर्थर रोड कारागृहातून सुटका झाली. सकाळी ११ च्या सुमारास आर्यन कारागृहातून बाहेर पडला. शाहरुख खान त्याला घेण्यासाठी आर्थर रोड कारागृहाजवळ गेला होता. २० दिवसांहून अधिक काळ कारागृहात राहिलेल्या आर्यनचं 'मन्नत' या बंगल्यावर जंगी स्वागत करण्यात आलं. ढोलताशांच्या गजरात आर्यनचं स्वागत झालं. शुक्रवारी रात्री मन्नत बंगल्याला रोषणाई करण्यात आली होती. तर चाहत्यांनीही बंगल्याबाहेर मोठी गर्दी केली. एकंदर या संपूर्ण घडामोडी पाहिल्यानंतर सोशल मीडियावर त्यावरून अनेक भन्नाट मीम्स व्हायरल होत आहेत.

ड्रग्ज प्रकरणातून कारागृहातून आर्यनची सुटका झाल्यानंतर आई गौरी खान मन्नतवर त्याचं स्वागत कशा पद्धतीने करणार, यावरून अनेक मीम्स व्हायरल होत आहेत. 'कभी खुशी कभी गम' या चित्रपटातील एका दृश्यावरून हे मीम्स तयार करण्यात आले आहेत. आर्यनच्या सुटकेनंतर सोशल मीडियावर सेलिब्रिटींसोबतच नेटकऱ्यांच्याही प्रतिक्रिया येत आहेत.

मुंबई उच्च न्यायालयाने एक लाख रुपये जातमुचलका आणि अटी-शर्तींवर आर्यनला जामीन मंजूर केला आहे. आर्यनसह त्याचा मित्र आणि ड्रग्ज प्रकरणातील सहआरोपी अरबाज मर्चंट आणि मुनमुन धमेचा यांनाही जामीन मंजूर करण्यात आला आहे. मात्र या दोघांची अद्याप कारागृहातून सुटका झालेली नाही. उच्च न्यायालयाने जामीन मंजूर करताना १४ अटी घातल्या आहेत.