प्रियंका चोप्राचं(Priyanka Chopra) निक जोनसशी(Nick Jonas) लग्न झालं आणि अमेरिकेचा हा सिंगर भारताचा जावई झाला. बरं आज लग्नाच्या तीन वर्षांनंतरही या दोघांच्या नात्यामधला गोडवा तसूभरही कमी झालेला दिसत नाही बरं का. मग अगदी दोघांचं नवीन घर असो,कुठलंही अॅवॉर्ड फंक्शन असो,पार्टीज असोत,शुटिंग असो की कुठल्याही मुलाखती असोत दोघेही एकमेकांसोबत हजर असतात आणि नसले तरी त्यांच्या तोंडून एकमेकांविषयी भरभरून बोललं जातं. दोघेही शुटिंगच्या निमित्ताने लांब असले तरी लंडन-अमेरिका असा प्रवास फक्त भेटण्यासाठी करतात. आणि महत्त्वाचं म्हणजे एकमेकांच्या कामाचा आदर ते नेहमीच मनापासून करताना दिसतात.

निक आणि प्रियंका यांच्या वयात जवळपास नऊ-दहा वर्षाचं अंतर असलं तरी ते त्यांच्या वागण्यातनं दिसून येत नाही. ना प्रियंका मोठी असल्यामुळे निकला कधी बंधनात ठेवताना दिसते ना निक लहान असल्यामुळे बेफ्रिक्रीपणात तिच्यासोबत वागताना दिसतो. ''निक जरी वयानं लहान असला तरी तो कधीकधी माझ्यापेक्षा जबाबदारीने वागतो'',असं एकदा प्रियंकाच एका मुलाखतीत बोलली होती. नुकतच निक त्याच्या एका मुलाखतीत असं काही बोलून बसला आहे की यावरून कळून येतं की त्याचं त्याच्या बायकोवर किती प्रेम आहे. याच मुलाखतीत त्यानं कबूल केलंय की लग्नाआधी त्याच्या मनात प्रियंकासोबतच्या नात्याला घेऊन एक भीती होती.

'जोनस ब्रदर्स' या मिनी सिरीजच्या पहिल्याच भागात निकनं म्हटलंय की, ''प्रियंकासोबत लग्न करताना मला वाटत होतं की मी लग्न तर करतोय पण मी एक चांगला नवरा बनू शकेन की नाही. माझ्या नात्याला न्याय देऊ शकेन की नाही. मला असंही वाटतं की मी एक चांगला भाऊ,मुलगा बनू शकेन ना. माझं माझ्या कुटुंबावर प्रेम आहे आणि ते सर्व माझ्यासाठी खूप महत्त्वाचे आहेत''. निकने ह्या मुलाखतीचा भाग इन्स्टाग्रामवर शेअर केला अनं त्याच्या फॅन्सनी खूप चांगल्या कमेंट्स केल्या आहेत. फॅन्स त्याला म्हणाले आहेत,'तू सिद्ध केलं आहेस की तू एक चांगला नवरा आहेस'. कुणी म्हणालंय की,'प्रियंकाला तुझ्यासारखा नवरा मिळाला आहे त्यामुळे ती खूप लकी आहे'. नुकताच निक आणि प्रियंकाने त्यांच्या लग्नाचा तिसरा वाढदिवस लंडनमध्ये सेलिब्रेट केला. कॅंडल लाइट डिनर करून या दोघांनी या दिवसाला स्पेशल बनवल्याचं त्यांनी शेअर केलेल्या फोटोजमधून दिसत होतं.