Actor, director G Marimuthu passes away: मनोरंजन विश्वातून एक दु:खद बातमी समोर आली आहे. लोकप्रिय तमिळ अभिनेते आणि दिग्दर्शक जी मारीमुथू यांचे आज (८ सप्टेंबर) निधन झाले. त्यांनी वयाच्या 58 व्या वर्षी अखेरचा श्वास घेतला.

जी मारीमुथू यांना सकाळी 8:30 वाजता हृदयविकाराचा झटका आला होता. ते सन टीव्ही सोप, एथिर नीचलसाठी डबिंग करत असतांना अचानक खाली कोसळल्याने त्यांना जवळच्या रुग्णालयात दाखल करण्यात आले, मात्र त्यावेळी डॉक्टरांनी त्यांना मृत घोषित केले.

मारिमुथू यांनी 1999 मध्ये अजितच्या 'वाली' चित्रपटात सहाय्यक अभिनेत्याच्या भूमिकेने आपल्या करिअरची सुरुवात केली होती. त्यांनी असई (1999) या चित्रपटात दिग्दर्शक वसंत यांना असिस्ट केले, ज्यात अजित, सुवललक्ष्मी आणि प्रकाश राज मुख्य भूमिकेत होते.

त्याचबरोबर त्यांनी कन्नम कन्नम (2008) या चित्रपटातुन दिग्दर्शन क्षेत्रात पदार्पण केले होते. त्यांनी चित्रपटाचे दिग्दर्शन तर केलेच पण कथा, पटकथा आणि संवादलेखनही केले आणि चित्रपटात एक छोटी भूमिका साकारली होती.

अनेक तामिळ चित्रपटात ते सहाय्यक अभिनेत्याच्या भुमिकेत दिसले. ज्यात युद्धम सेई (2011), कोडी (2016), बैरवा (2017), काडैकुट्टी सिंगम (2018), शिवरंजिनीयुम इनुम सिला पेंगलम (2021), आणि अतरंगी रे (2021) या हिंदी चित्रपट यांचा समावेश आहे.

त्यांनी 2014 मध्ये 'पुलिवाल' चित्रपट दिग्दर्शित केला होता ज्यात प्रसन्ना आणि वेमल यांच्या मुख्य भूमिका होत्या. हा एक थ्रिलर चित्रपट होता.

मारिमुथू यांचा या आठवड्यात रेड सँडल वुड चित्रपट रिलिज झाला होता , ज्यामध्ये त्यांनी कबाली-फेम विश्वंथच्या वडिलांची भूमिका साकारली होती. त्याचबरोबर त्यांनी इंडियन 2 मध्येही भूमिका साकारली आहे, जो त्यांचा शेवटचा चित्रपट असेल.

मारिमुथू यांच्यावर मदुराई येथे अंतिम संस्कार होणार असल्याची माहिती आहे. त्यांच्या पश्चात पत्नी, मुलगी, मुलगा असा परिवार आहे.