Jailor Actor Vinayakan Arrested: साउथ सुपस्टार रजनीकांतचा जेलर सिनेमा सुपर डुपरहिट झाला. थैलवा रजनीकांतची जादू भारतात नव्हे तर जगभरात पसरली. या चित्रपटाने अनेक रेकॉर्ड मोडले आणि बॉक्स ऑफिसवर धुराळा उडवून दिला.

मात्र आज जेलर सिनेमातील रजनीकांत नव्हे या चित्रपटात खलनायकाची भुमिका साकारणारा अभिनेता विनायकन चर्चेत आला आहे. त्याने जेलर चित्रपटात वर्मनची भुमिका साकारली होती. आता अभिनेता विनायकन अडचणीत सापडला आहे.

केरळ पोलिसांनी मंगळवारी विनायकनला अटक केली आहे. त्याच्यावर दारूच्या नशेत पोलिस ठाण्यात गोंधळ घातल्याचा आरोप करण्यात आला आहे. मंगळवारी संध्याकाळी त्याच्या अपार्टमेंटमध्ये झालेल्या वादानंतर त्याला एर्नाकुलम टाउन नॉर्थ पोलीसांनी अटक केली होती.

त्यानंतर त्याला पोलिस ठाण्यात नेण्यात आलं मात्र विनायकन इथेही शांत बसला नाही त्याने याठिकाणीही एकच गोंधळ घातला. त्यामुळे पोलीस ठाण्यात गोंधळ घातल्याने त्याला अटक करण्यात आल्याचे वरिष्ठ पोलीस अधिकाऱ्याने सांगितले. त्यानंतर त्याला वैद्यकीय चाचण्यांसाठी जवळच्या रुग्णालयात दाखल करण्यात आलं.

विनायकन सायंकाळी साडेसातच्या सुमारास स्टेशनवर पोहोचला आणि त्याने पोलिस कर्मचाऱ्यांशी गैरवर्तन केले. पोलिसांनी त्याला काही काळ सहन केले मात्र तरीही त्याचे अपमानास्पद वर्तन सुरूच राहिल्याने पोलिसांना त्याच्यावर कारवाई करून गुन्हा दाखल केल्याचे पोलिसांनी सांगितले आहे.

पोलीस ठाण्यातील एक महिला पोलीस अधिकारी आणि पाच पोलीस दुपारी 3.30 वाजे सुमारास विनायकनच्या घरी गेले होते. यावेळी जेव्हा पोलिसांनी विनायनककडे ओळखीचा पुरावा मागितला त्यावेळी तो भडकला आणि त्याने पोलिसांसोबत गैरवर्तन केले. त्यानंतर त्याला पोलिस ठाण्यात नेण्यात आले होते. तेव्हा तो दारुच्या नशेत असल्याने त्याने तिथेही चांगलाच राडा केला म्हणुन विनायकनला अटक करण्यात आली.

मात्र, विनायकनची नंतर जामिनावर सुटका करण्यात आली. पोलिसांनी त्याच्यावर गोंधळ घालणे आणि पोलिसांवर अश्लील टिप्पणी केल्याप्रकरणी गुन्हा दाखल केला आहे. विनायकनवर केरळ पोलिस कायद्याच्या जामीनपात्र कलमांतर्गत गुन्हा दाखल केला. त्यानंतर रात्री 10.30 वाजता त्याची जामिनावर सुटका करण्यात आली.