'कपिल शर्मा शो'(Kapil Sharma Show) गेली अनेक वर्ष जगभरात वसलेल्या भारतीयांचं अविरतपणे मनोरंजन करीत आहे. तसं पहायला गेलं तर शो अनेक वेळा वादांमुळेच जास्त चर्चेत राहिला. शो मध्ये कधी कुणावर केली जाणारी टीका वादाला कारणीभूत ठरली तर कधी कपिलच्या नको त्या ट्वीट्समुळेदेखील शो च्या लोकप्रियतेवर परिणाम झालेला दिसून आला. पण आता आणखी एका कारणामुळे शो वादात सापडलाय. आता तर चक्क शो वर बंदी आणण्याची मागणी केली जातेय. काय आहे नेमकं प्रकरण?

आपल्या सगळ्यांनाच माहित आहे की 'कपिल शर्मा शो' मध्ये बॉलीवूडच्या अनेक फिल्म्स प्रमोशनसाठी येतात,त्यानिमित्तानं त्यातील कलाकारही तिथे येऊन धम्माल करतात. इतकंच काय तर मराठीतल्या काही सिनेमांनाही कपिलच्या शो मध्ये निमंत्रण मिळालं होतं. पण बातमी आहे की विवेक अग्निहोत्री यांच्या 'द काश्मिर फाईल्स' या सिनेमाचं प्रमोशन आपल्या शो मध्ये करण्यास कपिलनं नकार दिला आहे. यावरनं विवेक यांनी ट्वीटरवर पोस्ट करून नाराजगी व्यक्त केली होती. त्यांनी थेट पोस्टमध्ये म्हटलं होतं की कपिल शर्मा शो नं त्याच्या शो मध्ये द काश्मिर फाईल्स सिनेमाचं प्रमोशन करण्याची आमची विनंती फेटाळली आहे. आमच्या सिनेमात मोठे कलाकार नाही म्हणून कपिल सिनेमाचं प्रमोशन करत नाही असंही त्यांनी म्हटलं होतं. त्यांच्या त्या पोस्टला आरोपाचा सूर होता. पण त्याचे भलतेच परिणाम नंतर दिसून येत आहेत. ट्वीटरवर 'कपिल शर्मा शो' च्या विरोधात नेटिझन्सनी संतापत बंदीची मागणी केली आहे. इतकंच काय तर ट्वीटरवर सध्या #Boycottkapilsharmashow हा हॅशटॅग टॉप ट्रेंडिंगला आहे. म्हणजे आता काश्मिरचा चांगलाच दणका कपिलला बसणार हे निश्चित.

काही दिवसांपूर्वी बॉलीवूडच्या खिलाडी कुमार म्हणजे आपल्या अक्षय कुमारनेही(Akshay Kumar) कपिलच्या मोदींविरोधातल्या वक्तव्याचा निषेध करीत एक महत्तवाचा निर्णय घेतला होता. त्यानं आपल्या 'बच्चन पांडे' सिनेमाचं प्रमोशन 'कपिल शर्मा शो' मध्ये करणार नाही असं ठरवलं होतं. पण त्यानंतर कपिलनं जाहिरपणे त्याची माफी मागितली आणि आता सगळं आलबेल झालं असं म्हणतायत. पण नेटिझन्सना कोण समजावणार. त्यांनी तर थेट ट्वीटरवर कपिल विरोधात आंदोलनच पुकारलंय. आता विवेक अग्निहोत्री यांच्या आरोपावर कपिल किंवा त्याच्या टीमकडून काय उत्तर येतंय आणि वादावर पडदा कधी पडतोय याकडे सगळ्यांचं लक्ष आहे.