Kareena Kapoor Burkha Photo: सोशल मीडिया हे एक असं माध्यम आहे जिथे जुने फोटो आणि व्हिडीओ अगदी कुठूनही धुंडाळून काढत व्हायरल केले जातात. बऱ्याचदा चाहत्यांना या अशा सगळ्या गोष्टी खोदून काढायला आवडतात ते आपल्या लाडक्या कलाकारांविषयी. नुकतेच करिनाचे काही जुने फोटो ज्यात तिनं बुरखा घातलेला, ते फोटो सोशल मीडियावर तुफान व्हायरल होताना दिसत आहेत.(Kareena Kapoor khan throwback pic in burkha surface,viral on social media.)

चला आता करिनानं(Kareena Kapoor) कोणत्या सिनेमात बुरखा घातलेला असा विचार करताना तुम्ही देखील डोकं खाजवायला लागला असाल ना. तर बुरख्यामधील करिनाचा तो व्हायरल झालेला फोटो आहे तिच्या 'रेफ्युजी' या पदार्पणातील सिनेमाचा. म्हणजे जवळ-जवळ २२ वर्षांपूर्वीचा. करिनाच्या एका फॅन पेजवर कुणा एका चाहत्यानं 'रेफ्युजी' मध्ये नाझनीन बनलेल्या करिनाचा तो फोटो पोस्ट केला आहे.

करिनाच्या सध्याच्या सिनेमांविषयी बोलायचं झालं तर करिना नुकतीच आपल्याला आमिर सोबत त्याच्या 'लाल सिंग चड्ढा' सिनेमात दिसली होती. लाल सिंग चड्ढा वादात सापडल्यानं अर्थातच करिना देखील यादरम्यान काही वक्तव्यांमुळे वादात आली होती. सिनेमाला बॉयकॉट केल्यानं बॉक्सऑफिसवर करिनाचा 'लाल सिंग चड्डा' सपशेल झोपल्यात जमा आहे आता. या सिनेमात आमिर खान,करिना कपूर खान सोबतच मोना सिंग आणि नागा चैतन्य देखील महत्त्वाच्या भूमिकेत आहेत. सिनेमाचं दिग्दर्शन अद्वैत चंदनचे असून सिनेमाची कथा अतुल कुलकर्णीनं लिहिली आहे.

आमिर-करिनाच्या लाल सिंग चड्ढाला बॉक्सऑफिसवर टक्कर द्यायला अक्षयचा रक्षाबंधनही रिलीज झाला होता. पण दोन्ही सिनेमांना बॉयकॉट केल्यानं बॉक्सऑफिसवर नुकसान सहन करावं लागलं. आणि दोन्ही सिनेमांकडून असलेली अपेक्षा फोल ठरलेली आहे.