Mamukkoya Passed Away: दाक्षिणात्य मनोरंजन विश्वातील मल्याळम अभिनेते मामुकोया (Mamukkoya) यांचे हृदयविकाराच्या झटक्याने निधन झाले आहे. वयाच्या 76 व्या वर्षी त्यांनी अखेरचा श्वास घेतला. त्यांच्या निधनानं मल्याळम चित्रपटसृष्टीत शोककळा पसरली आहे. अनेक कलाकारांनी सोशल मीडियावर मामुकोया यांच्या विषयी आपल्या भावना व्यक्त केल्या आहेत.

(Malayalam actor Mamukkoya passes away at 76)

मामुकोया हे एका फुटबॉलशी संबंधित एका कार्यक्रमात गेले होते. त्या कार्यक्रमामध्ये ते भोवळ येऊन पडले. यानंतर त्यांना तातडीने रुग्णालयात दाखल करण्यात आले. कोझिकोड येथील खासगी रुग्णालयात त्यांच्यावर तातडीने उपचार सुरू केले पण उपचारादरम्यान त्यांचा मृत्यू झाला.

मामुकोया यांना काही काळ व्हेंटिलेटरवर ठेवण्यात आले होते. परंतु त्यांच्या प्रकृतीत कोणतीही सुधारणा झाली नाही आणि आज बुधवार २६ एप्रिल रोजी त्यांनी अखेरचा श्वास घेतला. 

मामुकोया यांनी ४०० हून अधिक चित्रपटांमध्ये काम केले होते. 1979 मध्ये त्यांनी अभिनय क्षेत्रात पदार्पण केले. त्यांनी अनेक विनोदी भूमिकाही साकारल्या आहेत. हलाल लव्ह स्टोरी, कुरुथी आणि मिनल मुरली यांसारख्या चित्रपटांमध्ये  मामुकोया यांनी काम केलं. एवढेच नाही तर त्यांनी 'फ्लॅमन इम पॅराडी' या फ्रेंच चित्रपटात देखील काम केले आहे.

गेल्या वर्षी रिलीज झालेल्या 'कोब्रा' या चित्रपटात मामुकोया यांनी महत्वाची भूमिका साकारली,या चित्रपटामध्ये त्यांनी साऊथचा सुपरस्टार विक्रमसोबत काम केले होते. त्यांनी कायमच आपल्या अभिनयानं प्रेक्षकांची मनं जिंकली. त्यांच्या निधणानंतर  अनेकांनी सोशल मीडियावर पोस्ट शेअर करत मामुकोया यांना श्रद्धांजली वाहिली आहे. केरळचे राज्यपाल आरिफ मोहम्मद खान यांनी देखील शोक व्यक्त केला आहे.