Kiran Mane in Politics: आगामी निवडणुकांच्या दृष्टीकोनातून राजकीय वर्तुळात घडामोडींना वेग आला आहे. पक्षप्रवेशही मोठ्या प्रमाणावर वाढले आहेत, यामुळे राजकीय पक्षांना बळ मिळताना दिसत आहे. आज माजी मुख्यमंत्री उद्धव ठाकरे यांच्या मातोश्री या निवासस्थानी प्रसिद्ध मराठी अभिनेते किरण माने आणि बीडमधील काही कार्यकर्त्यांचा ठाकरे गटात प्रवेश झाला. उद्धव ठाकरे यांनी या सर्वांना शिवबंधन बांधून त्यांना ठाकरे गटात प्रवेश दिला.

दरम्यान, यावेळी कार्यकर्त्यांनी आपलं मनोगत व्यक्त करताना आपल्या घरात आल्यासारखं वाटतंय. पूर्वी शिवसैनिक होतो, आजही शिवसैनिक आहे, अशी भावना कार्यकर्त्यांनी यावेळी व्यक्त केली. यावेळी ठाकरे गटाचे महत्त्वाचे नेतेही उपस्थित होते. यावेळी बोलताना उद्धव ठाकरे यांनी शिंदे गटाला पुन्हा शिवसेनेत प्रवेश देणार नसल्याची घोषणा केली.

किरण माने यांनी आजवर मराठी नाटक, सिनेमे, मालिकाविश्वात अभिनय केलाय. ते बिग बॉस मराठी ४ मध्ये सहभागी होते. याशिवाय मुलगी झाली हो, सिंधूताई माझी माई या मालिकांमध्ये त्यांना काम केलंय.

किरण माने यांनी परफेक्ट मिसमॅच, उलट सुलट या नाटकांमध्ये अभिनय केलाय. किरण माने आता अभिनय क्षेत्र गाजवून राजकीय क्षेत्रात कशी वाटचाल करणार, याची सर्वांना उत्सुकता आहे.

काय म्हणाले किरण माने?

यावेळी बोलताना किरण माने म्हणाले,"शिवसेना सर्वसामान्यांची आहे. राजकारण गढूळ झालेलं असताना एकटा माणूस लढत आहे. त्यामुळे मी एक संवेदनशील अभिनेता म्हणून माणूस म्हणून सोबत येण्याचा निर्णय घेतला आहे". "संविधान वाचवण्यासाठी मी पक्षामार्फत काम करेल. मिळेल ती जबाबदारी घेऊन काम करेल".