अश्लील चित्रफितनिर्मितीप्रकरणी मुंबई गुन्हे शाखेने व्यावसायिक आणि अभिनेत्री शिल्पा शेट्टीचा पती राज कुंद्राच्या कानपूरमधील स्टेट बँक ऑफ इंडियामधील दोन खाती ताब्यात घेतली आहेत. बँक कर्मचाऱ्यांनी या वृत्ताला दुजोरा दिला आहे. राज कुंद्राच्या या दोन्ही बँक खात्यांमध्ये कोट्यवधी रुपये जमा करण्यात आल्याची माहिती बँक अधिकाऱ्यांनी दिली. रविवारी पोलिसांकडून ही कारवाई करण्यात आली. याचवेळी कुंद्राशी संबंधित आणखी एक मोठी माहिती पोलिसांच्या हाती लागली. अरविंद श्रीवास्तव हा राज कुंद्राची प्रॉडक्शन कंपनी चालवत होता आणि सर्व पैसे अरविंदची पत्नी हर्षिताच्या बँक खात्यात जमा केले जात होते. 'टाइम्स ऑफ इंडिया'ने यासंदर्भातील वृत्त दिले आहे. (Mumbai Crime Branch seizes Raj Kundras bank accounts in Kanpur slv92)

अरविंद गेल्या दोन वर्षांपासून घरी न आल्याचं त्याचे वडील एन.पी. श्रीवास्तव यांनी एएनआय वृत्तसंस्थेला दिलेल्या मुलाखतीत सांगितलं. अरविंद घरी येत नसला तरी तो दर महिन्याला घरखर्चासाठी पैसे पाठवत असल्याचं त्यांनी पुढे सांगितलं. फेब्रुवारी २०२१ मध्ये मुंबई गुन्हे शाखेने अरविंद श्रीवास्तवसाठी लूकआऊट नोटीस जारी केल्याचं त्याच्या वडिलांनी सांगितलं. त्याचप्रमाणे त्याच्या कामाबद्दल आणि हर्षिताच्या बँक खात्यात जमा होणाऱ्या रकमेबद्दल कोणतीच माहिती नसल्याचं त्यांनी स्पष्ट केलं.

राज कुंद्राची हायकोर्टात धाव

राज कुंद्राने पोलीस कोठडी रद्द करण्यासाठी मुंबई उच्च न्यायालयात याचिका केली आहे. जो कंटेंट पोलीस अश्लील म्हणून दाखवत आहेत तो थेट अश्लील वर्तन नसून एका विशिष्ट इच्छुक वर्गासाठी तयार केलेल्या शॉर्टफिल्म्स आहेत, असा दावा कुंद्राने केला आहे. पोलिसांनी केलेली अटक बेकायदेशीर असून त्याची कायदेशीर पूर्वसूचना देण्यात आली नाही. त्यामुळे महानगर दंडाधिकारींनी दिलेला रिमांडही बेकायदेशीर आहे असा दावा कुंद्राने केला आहे.