शाहरुख खानचा 'पठाण' हा चित्रपट आज थिएटरमध्ये रिलीज झाला आहे. या चित्रपटाबद्दल चाहत्यांना प्रचंड उत्सुकता आहे.अनेक ठिकाणी 'पठाण' ची क्रेझ पाहायला मिळत आहे. तर काही ठिकाणी या चित्रपटाला विरोधही करण्यात येत आहे.

इंदूरमधील सपना संगीता टॉकीजसमोर एका हिंदू संघटनेकडून या चित्रपटाला जोरदार विरोध करण्यात आला. निदर्शने करण्यात आली. यानंतर सकाळी ९ वाजेचा शोही रद्द करण्यात आला आहे. मोठ्या प्रमाणात पोलीस बंदोबस्त तैनात असतानाही पहिल्या दिवसाचा पहिला शो रद्द करण्यात आला असल्याचा दावा करण्यात येत आहे. बजरंग दलाच्या कार्यकर्त्यांनी रस्त्यावर घोषणाबाजी करत मल्टिप्लेक्स पेटवून देण्याची धमकी दिली.  घटनास्थळी मोठ्या संख्येने सुरक्षा दलही हजर आहे.

मध्य प्रदेशचे गृहमंत्री नरोत्तम मिश्रा यांनी चित्रपटातील बेशरम रंग या गाण्याला आणि दीपिकाच्या भगव्या बिकिनीला कडाडून विरोध केला. आता चित्रपट प्रदर्शित झाल्याच्या दिवशी मध्य प्रदेशात ठिकठिकाणी पठाणला विरोध केला जात आहे.

इंदूरमध्ये बजरंग दलाच्या आंदोलकांनी शाहरुख खानच्या पठाण या चित्रपटाचा पोस्टर बॅनर फाडून निषेध केला. त्याचवेळी ग्वालियरमध्ये बजरंग दलाने सिनेमा हॉल पेटवण्याची धमकी दिली आहे.

उत्तर प्रदेशातील आग्रा येथे हिंदू महासभेच्या दक्षिणपंथी संघटनेच्या कार्यकर्त्यांनी मंगळवारी चित्रपटाच्या पोस्टरवर शाई फेकून ते फाडले. हिंदु महासभेचे नेते संजय जाट म्हणाले की, संघटना कोणत्याही किंमतीत ‘पठाण’ चित्रपट प्रदर्शित होऊ देणार नाही, तर बजरंग दलाचे राज्य सहसंयोजक दिग्दिविजय नाथ तिवारी यांनी सांगितले की, माझा आणि त्यांच्या संघटनेच्या कार्यकर्त्यांचाही या चित्रपटाला विरोध आहे.