Jacqueline Fernandez : जॅकलिननं (Jacqueline Fernandez) नुकताच आपला वाढदिवस मोठ्या उत्साहात साजरा केला. पण चार दिवसही तो आनंद तिला टिकवता आला नाही याचं कारण महाठग सुकेश चंद्रशेखर केसप्रकरणात तिचा असलेला सहभाग. आता पुन्हा एक मोठा दणका ईडीनं(ED) तिला दिला आहे. महाठग सुकेश चंद्रशेखरशी संबंधित 200 कोटींच्या खंडणी प्रकरणात आरोपपत्र दाखल करण्यात आले असून, या आरोपपत्रात अभिनेत्री जॅकलिन फर्नांडिसच्या नावाचाही समावेश करण्यात आला आहे. ईडीच्यावतीने दिल्ली न्यायालयात पीएमएलए अंतर्गत आरोपपत्र दाखल करण्यात आले आहे. अलीकडेच ईडीने जॅकलिनची सुमारे 7 कोटी 12 लाखांची एफडी जप्त केली होती. आरोपी म्हणून जॅकलिनचे नाव आल्याने आता तिच्या अडचणीत वाढ झाली असून, या प्रकरणी ईडीकडून जॅकलिनविरोधात आरोपपत्र दाखल करण्यात आले आहे.

बॉलिवूड अभिनेत्री जॅकलिन फर्नांडिसचे सुकेश चंद्रशेखरसोबतचे कनेक्शन समोर आल्यापासून ती कायदेशीर अडचणीत सापडली आहे. सुकेशने जॅकलिनला 10 कोटी रुपयांच्या भेटवस्तू पाठवल्याचं ईडीला आढळून आलं होतं. त्यानंतर ईडीने केलेल्या कारवाईत आतापर्यंत जॅकलिनची 7 कोटींहून अधिकची संपत्ती जप्त करण्यात आली आहे. सुकेशने जॅकलिनच्या कुटुंबीयांना महागड्या भेटवस्तूही दिल्याचे तपासात समोर आले होते. यामध्ये कार, महागड्या वस्तू याशिवाय 1.32 कोटी आणि 15 लाख रुपयांच्या निधीचा समावेश होता.

जॅकलिनच्या या वादग्रस्त प्रकरणात आता अभिनेता आर.माधवननं तिला पाठिंबा देत प्रतिक्रिया नोंदवली आहे. आज आर.माधवन त्याच्या धोका-राऊन्ड द कॉर्नर या सिनेमाच्या प्रमोशनसाठी एका प्रमोशनल कार्यक्रमात उपस्थित राहिला होता.

त्याच कार्यक्रमात माधवन म्हणाला,''मला आशा आहे ती संकटातून सहीसलामत लवकच बाहेर पडेल. मला नाही वाटत यामुळे देशाची प्रतिमा खराब होत आहे. उलट,आमच्या सिनेइंडस्ट्रीत खूप कमी लोकांना ईडीच्या छाप्यांचा सामना करावा लागला आहे. इथे सगळेच खूप प्रामाणिकपणे काम करतात. मला नाही वाटत जॅकलिनमुळे इंडस्ट्रीला काही अडचण निर्माण होईल. उलट सगळ्यात जास्त कर वेळेत भरणारे लोक हे सिनेइंडस्ट्रीतूनच आहेत''.

'धोका-द राऊन्ड द कॉर्नर' सिनेमात आर.माधवन सोबतच अपराशक्ती खुराना,कौशिक कुमार आणि दर्शन कुमार देखील दिसणार आहेत. हा सिनेमा सप्टेंबर २०२३ मध्ये सिनेमागृहात प्रदर्शित होत आहे. या सिनेमाची निर्मिती भूषण कुमार,धर्मेंद्र शर्मा आणि विक्रांत शर्मा यांची आहे.