अभिनेत्री मंदिरा बेदीचा Mandira Bedi पती राज कौशल Raj Kaushal यांचे कार्डिअॅक अरेस्टने बुधवारी पहाटे निधन झाले. ते ४९ वर्षांचे होते. राज यांच्या निधनाने संपूर्ण इंडस्ट्रीवर शोककळा पसरली आहे. राज यांची प्रकृती एक दिवस आधीच ढासळली असल्याचं त्यांचा मित्र आणि संगीत दिग्दर्शक सुलेमान मर्चंटने Sulaiman Merchant सांगितलं. राज यांनी हृदयविकाराचा झटका येत असल्याचं मंदिराला सांगितलं होतं, असं ही ते म्हणाले. पण त्यांना उपचारासाठी रुग्णालयात घेऊन जाईपर्यंत उशीर झाला होता. (Raj Kaushal told wife Mandira Bedi he was getting a heart attack says friend Sulaiman Merchant)

'ई टाइम्स'ला दिलेल्या मुलाखतीत सुलेमान म्हणाले, "मंगळवारी संध्याकाळपासूनच राज यांना बरं वाटत नव्हतं. त्यांनी काही अँटासिड टॅबलेट घेतल्या पण दुसऱ्या दिवशी पहाटेच चार वाजताच्या सुमारास त्यांनी मंदिराला सांगितले की, हृदयविकाराचा झटका येतोय. त्यानंतर मंदिराने मित्र आशिष चौधरीला बोलावून राज यांना रुग्णालयात नेण्याची तयारी केली. पण तितक्यात राज बेशुद्ध झाले. रुग्णालयात दाखल केल्यानंतर त्यांना मृत घोषित करण्यात आले."

राज यांना ३०-३२ वर्षांचे असतानाही हृदयविकाराचा झटका आल्याचं सुलेमानने सांगितलं. पहिल्या झटक्यानंतर राज यांना स्वत:ची काळजी घेण्यास सुरुवात केली होती, असंही ते म्हणाले. राज आणि सुलेमान हे गेल्या २५ वर्षांपासून एकमेकांचे चांगले मित्र होते. राज यांनी दिग्दर्शित केलेल्या 'प्यार मे कभी कभी' या पहिल्या चित्रपटाला सलीम आणि सुलेमान या जोडीने संगीत दिले होते.