Ravindra Berde News: रविंद्र बेर्डे यांचं आज वयाच्या ७८ व्या वर्षी हृदयविकाराच्या झटक्याने निधन झालंय. रविंद्र बेर्डे यांच्या निधनाने सिनेसृष्टीत शोककळा पसरली आहे.

रविंद्र बेर्डे हे लक्ष्मीकांत बेर्डे यांचे सख्खे भाऊ होते. लक्ष्मीकांत - रविंद्र या दोघांनीही एकत्र अनेक सिनेमांंमध्ये काम केलंय. पण या दोघांनी मराठी रंगभूमीही गाजवलीय. जाणून घेऊ.

रविंद्र - लक्ष्मीकांत यांच्या जोडीने गाजवली रंगभूमी

रविंद्र बेर्डे - लक्ष्मीकांत बेर्डे या दोघांनी अनेक सिनेमांमध्ये एकत्र काम केलं. धडाकेबाज, चंगू मंगू, माझा छकुला अशा अनेक सिनेमांमध्ये रविंद्र - लक्ष्मीकांत जोडीने मराठी सिनेसृष्टीत स्वतःची छाप पाडली.

केवळ चित्रपट नाही तर एका नाटकातून त्यांनी मराठी रंगभूमीवर अक्षरशः धुमाकुळ केला. हे नाटक म्हणजे शांतेचं कार्ट चालू आहे.

या नाटकात रविंद्र - लक्ष्मीकांत एकत्र काम करायचे. या दोघांच्या अफलातून विनोदी जुगलबंदीने लोकं खळखळून हसायचे. या नाटकात रविंद्र - लक्ष्मीकांत यांच्यासोबतच नयनतारा, सुधीर जोशी असे दिग्गज कलाकार होते.

रविंद्र बेर्डे यांचे सिनेमे

रविंद्र बेर्डे यांनी मराठी चित्रपट आनाडी, खतरनाक, होऊन जाऊ दे, हमाल दे धमाल, चंगू मंगू, थरथराट, उचला रे उचला, धडाकेबाज, गंमत जंमत, झपाटलेला, भुताची शाळा, हाच सुनबाई चा भाऊ यांसारख्या गाजलेल्या सिनेमांमध्ये काम केले होते.

रविंद्र बेर्डेंच्या निधनाने मराठी चित्रपटसृष्टीतील विनोदाचा तारा आपण गमावला, अशी प्रत्येकाची भावना आहे.