मराठा आरक्षण आंदोलनाचे नेते मनोज जरांगे यांचा प्रवास रूपेरी पडद्यावर लवकरच पाहायला मिळणार आहे. याची घोषणा काही महिन्यांपूर्वीच झाली होती. आता या सिनेमाचा टीझरही प्रदर्शित करण्यात आला आहे.

तसंच सिनेमाच्या प्रदर्शनाची तारीखही समोर आली आहे. अभिनेता रोहन पाटील हे मनोज जरांगे यांच्या भूमिकेत आहेत. गोवर्धन दोलताडे यांनी चित्रपटाची निर्मिती केली आहे. शिवाजी दोलताडे दिग्दर्शित या सिनेमात अभिनेत्री सुरभी हांडे, मोहन जोशी, श्रीनिवास पोकळे, संजय कुलकर्णी, माधवी जुवेकर, विजय मिश्रा, विनीत भोंडे, सुनील गोडबोले, जयवंत वाडकर हे कलाकार महत्त्वाच्या भूमिकेत दिसतील.

दरम्यान, या सिनेमाचा टीझर समोर आला आहे. सिनेमात मराठा आंदोलनाची झलक पाहायला मिळतेय. जाहीर सभा, बाईक रॅली, ‘एक मराठा, लाख मराठा’च्या घोषणा हे सगळं पाहायला मिळत आहे. तर मनोज जरांगे यांच्या म्हणजेच रोहन पाटील यांच्या तोंडी असलेले संवादही लक्ष वेधून घेत आहेत. ‘मी बायकोला सांगतानाच सांगितलंय आलो तर तुझा..., गेलो तर समाजाचा’ हा डायलॉग सध्या लोकांच्या चांगलाच पसंतीस उतरत आहे. येत्या २६ एप्रिलला हा चित्रपट संपूर्ण महाराष्ट्रात प्रदर्शित होणार आहे.