Shehnaz Gill and Salman Khan News शहनाज गिल (Shehnaaz Gill) बिग बॉस १३ मधील उल्लेखनीय भूमिका आणि दिवंगत अभिनेता सिद्धार्थ शुक्लासोबतच्या केमिस्ट्रीमुळे चांगलीच प्रसिद्धी झाली. इतकेच नाही तर ती सर्वकाळातील सर्वांत लोकप्रिय आणि आवडती बिग बॉस सेलिब्रिटी बनली. शोमधून बाहेर आल्यापासून तिची लोकप्रियता आणखी वाढली आहे. वृत्तांवर विश्वास ठेवला तर शहनाज गिल सलमान खानसोबत (Salman Khan) बिग बॉस १६ होस्ट करणार आहे.

जेव्हा जेव्हा बिग बॉसच्या नवीन सीझनची घोषणा होते तेव्हा प्रत्येकाचा पहिला प्रश्न असतो की शोचा होस्ट कोण असेल? सलमान खान बराच काळ हा शो होस्ट करीत असला तरीही या चर्चांना उधाण येतेच. काही दिवसांपूर्वीच सलमान खानऐवजी दिग्दर्शक रोहित शेट्टी शो होस्ट करणार असल्याची चर्चा होती. मात्र, आता शहनाज गिल सलमान खानसोबत बिग बॉस १६ होस्ट करणार असल्याची बातमी आहे.

ताज्या वृत्तानुसार, हा शो १ ऑक्टोबरपासून सुरू होणार आहे. शहनाज गिल (Shehnaaz Gill) शोच्या प्रीमियर एपिसोडमध्ये सलमान खानसोबत दिसणार आहे. सलमान खानने प्रोमोसाठी शूटिंग देखील केले आहे. प्रोमो सप्टेंबरच्या दुसऱ्या आठवड्यात येईल, अशी माहिती आहे. मात्र, याबाबत अधिकृत पुष्टी नाही. परंतु, शहनाज प्रीमियर एपिसोडमध्ये सलमानसोबत स्टेजवर असेल. शहनाज गिल सध्या सलमान खानच्या ‘किसी का भाई किसी की जान’ या चित्रपटाच्या शूटिंगमध्ये व्यस्त आहे.

फरहाद सामजी दिग्दर्शित या चित्रपटात व्यंकटेश दग्गुबाती आणि पूजा हेगडे यांच्याही भूमिका आहेत. सलमान खानचा (Salman Khan) मेहुणा आयुष शर्माही या चित्रपटाचा एक भाग होता. मात्र, तो चित्रपटातून बाहेर पडल्याचे कळते. बिग बॉस १३ मधून शहनाज गिल चांगलीच प्रसिद्ध झाली. बिग बॉसमधून बाहेर आल्यानंतर तिने अनेक म्युझिक व्हिडिओंमध्ये काम केले. ती अखेरची दिलजीत दोसांझच्या होंसला रख या चित्रपटात दिसली होती.