ज्या अभिनेत्याच्या नावातच एवढी मोठी ताकद आहे की त्याच्या चित्रपटांना गर्दी होणं स्वाभाविक आहे. थलायवा या नावानं दाक्षिणात्य चित्रपटसृष्टीत त्यांना देवाचा दर्जा आहे. त्यांच्या अभिनयाचे कौतूक केवळ भारतातच नाही तर जगभरात केले जाते. अशा रजनीकांत यांचा नवा चित्रपट आता प्रेक्षकांच्या भेटीला येणार आहे. जगभरातील अकराशे हून अधिक चित्रपटगृहांमध्ये त्यांचा अन्नाथे नावाचा चित्रपट प्रदर्शित होणार आहे. काही दिवसांपूर्वी रजनीकांत हे रुग्णालयात दाखल झाल्याच्या बातम्या व्हायरल झाल्या होत्या. वास्तविक ते त्यांच्या रुटीन चेक अपसाठी रुग्णालयात गेल्याची माहिती त्यांच्या पत्नीनं दिली होती.

साधारण आठवड्यापूर्वी रजनीकांत यांना देशातील चित्रपट क्षेत्रातील सर्वोच्च अशा दादासाहेब फाळके पुरस्कारानं गौरविण्यात आले होते. उपराष्ट्रपती वेंकय्या नायडू यांच्या हस्ते त्यांना सन्मानित करण्यात आले होते. आतापर्यत तमिळ चित्रपटसृष्टीसाठी अभिमानास्पद असणारी बाब म्हणजे रजनीकांत यांचा अन्नाथे नावाचा चित्रपट तब्बल अकराशे परदेशी चित्रपटगृहांमध्ये दाखवला जाणार आहे. अशी कामगिरी कऱणारा दाक्षिणात्य चित्रपटांतील अन्नाथे हा पहिलाच चित्रपट ठरला आहे. रजनीकांत लोकप्रिय अभिनेते आहे. केवळ भारतातच नाहीतर जगभरातील वेगवेगळ्या देशांमध्य़े त्यांचा चाहतावर्ग आहे. ज्या निर्मात्यांकडून हा चित्रपट प्रदर्शित होणार आहे त्यांनी त्यांच्या प्रदर्शनाविषयीची माहिती व्टिट करुन दिली आहे.

एकट्या अमेरिकेतील 677 चित्रपटगृहांमध्ये अन्नाथे पाहायला मिळणार आहे. तर दुबईतील 117 चित्रपटगृहांमध्ये हा चित्रपट प्रदर्शित होणार आहे. मलेशियातील 110 चित्रपटगृहांमध्ये अन्नाथे प्रेक्षकांना पाहता येणार आहे. तर श्रीलंकेतील 86 चित्रपटगृहांमध्ये हा चित्रपट प्रदर्शित होणार आहे. याशिवाय इंग्लड, युरोपातील काही देश, ऑस्ट्रेलिया, न्युझीलंडमध्येही रजनीकांतच्या चाहत्यांना अन्नाथेचा आनंद घेता येणार आहे. या चित्रपटामध्ये रजनीकांत यांच्याशिवाय नयनतारा, खुशबू, मीना, कीर्ती सुरेश हे कलाकार आहेत.