अतरंगी फॅशन करण्यामुळे अभिनेत्री उर्फी जावेद(Urfi Javed) नेहमीच चर्चेत असते. बरं ती नेहमीच आपले फोटो,व्हिडीओ सोशल मीडियावर शेअर करताना दिसते अन् त्यावरनं अनेकदा ट्रोलही होताना दिसते. पण बिनधास्त उर्फी कधीच ट्रोलिंग मनावर घेताना दिसत नाही. उलट ट्रोल झाल्यानंतर तिचा पुढचा ड्रेस हा अधिक हटके असतो,अर्थात अतरंगी. नुकताच तिचा एक व्हिडीओ व्हायरल झाला होता,ज्यात ती मीडिया हाऊसच्या एका सुरक्षा रक्षकावर भलतीच चिडली होती. तिला त्या मीडिया हाऊसनं मुलाखतीसाठी निमंत्रण दिलं होतं पण तरिही त्या सुरक्षारक्षकानं तिला हटकलं. आता त्यावेळचे तिचे अतरंगी कपडे पाहून बहुधा तिच्याबद्दल तो साशंक झाला असेल अन् अनावधनानं अपमानास्पद बोलून गेला असेल. पण उर्फीचा पारा चांगलाच चढला होता.

उर्फीचा हा व्हिडीओ व्हायरल झाला अन् नेटकऱ्यांनी त्यावर आपल्या प्रतिक्रिया नोंदवल्या आहेत. पण यात आता ज्वेलरी डिझायनर फराह अली खानच्या कमेंटनं सगळ्यांचे लक्ष वेधले आहे. तिनं लिहिलंय,'' मला माफ करा माझं काही चुकत असेल तर पण या मुलीला अशी विचित्र फॅशन करण्यासाठी नक्कीच फटकारायला हवं. लोकं तिचा पेहराव पाहून तिची मजा उडवतायत आणि तिला वाटतंय लोकांना तिचा पेहराव आवडला म्हणून प्रशंसा करतायत. कोणीतरी तिला सांगा समजावून''. या फराहच्या कमेंटमुळे उर्फीचा पारा जास्तच चढला आहे.तिनं फराहला म्हटलंय,''फराह मॅम तुमच्यामते शिस्तीत चांगला पेहराव करणं म्हणजे नेमकं काय? कृपया मला समजावून सांगाल. मला माहिती आहे मी जसे ड्रेस घालते ते लोकांना आवडत नाही,मी कोणत्याही गैरसमजाची बळी नाही,हो पण मला लोकं काय म्हणतात याची फिकीरही नाही. त्यांच्या मतांचा मी विचार करीत नाही''.

''तुमचे नातेवाईक फिल्म निर्माते आहे,सिनेमाशी संबंधित आहेत,त्यांच्या सिनेमात आयटम नंबर करणाऱ्या महिला जे कपडे घालतात ते खूप चांगले शिस्तीतले असतात असं म्हणायचंय का तुम्हाला? आणि त्या आयटम नंबरमध्ये जे अंगप्रदर्शन केलं जातं ते चालतं का? तुमच्या घरात आधी डोकावून पहा. मग बाहेरच्यांना नावं ठेवा. तुमच्यासाठी हे कदाचित चालत असेल,स्टार किड्सनी कसेही कपडे घालणं,काहीही करणं. . तुम्ही म्हणालात,माझे ड्रेस लोकांना आवडत नाहीत,मी माझी फॅशन बदलावी. मग तुमच्या कुटुंबाविषयी देखील त्यांना खूप काही माहित आहे. तुम्ही ऐकून घ्याल आणि त्यांनी सांगितल्याप्रमाणे बदल कराल का स्वतःमध्ये? स्टार किड्स देखील त्यांच्या ड्रेसिंगमुळे ट्रोल होतात,त्यांना सांगाल का तुम्ही ड्रेसिंग सेन्स बदल म्हणून. ८० दशकातल्या लोकांना मी आवडणार नाही. उद्या लोकांनी उठून तुम्हाला सांगितलं तुमच्या मुलांचा चेहरा आवडत नाही,मग ते पण बदलाल का? यात काय लॉजिक आहे. तुम्ही तुमच्या मुलीशी हे बोलाल का? लोकांना नाही आवडलं,म्हणून स्वतःला बदला,हे तुमच्यासारख्या स्त्री कडून मला अपेक्षित नव्हतं. एक महिला असून दुसऱ्या महिलेला असं बोलून लाजवलंत तुम्ही. मी कधी तुम्हाला स्टार किड्सना असं फटकारताना पाहिलं नाही त्यांच्या चुकलेल्या ड्रेसिंग सेन्सवरुन?''