उस्मानाबाद: शहरातील प्रख्यात वकील ॲड. राजेश अंधारे यांचे अल्पशा आजाराने सोलापूर येथे रविवारी (ता. नऊ) निधन झाले. दरम्यान, विधीज्ञ मंडळातील आतापर्यंत १३ जणांचा मृत्यू झाला असून वकील मंडळींनी कोरोना संसर्गाची दक्षता घेण्याचे आवाहन केले जात आहे. शिवाय विधीज्ञ मंडळातील सदस्यांना विमा कवच देण्याची मागणी केली जात आहे.

कोरोना संसर्गाने (covid 19 infection) मोठ्या प्रमाणात नागरिकांचे हाल होत आहेत. दरम्यान, सध्या ग्रामीण भागातही कोरोनाचा शिरकाव वाढला आहे. कोरोना संसर्गापासून विधिज्ञ मंडळाचे सदस्यही सुटलेले नाही. आतापर्यंत जिल्ह्यातील प्रख्यात वकिलांना कोरोनाची लागन होऊन जीव गमवावा लागला आहे. त्यांना कसलेही सुरक्षा कवच नाही. वकिलांचा थेट संपर्क पक्षकारांशी येतो. अनेक पक्षकार कोरोना पॉझिटिव्ह असतात. त्यामुळे विधिज्ञांच्या कुटुंबातील सदस्यांनाही कोरोनाची लागण होत असून, अनेकजण दगावले आहेत. यामध्ये अनेकजण ४५ वर्षे वयापेक्षा कमी वयाचे आहेत. जिल्ह्यात आतापर्यंत १३ वकिलांना कोरोनाची लागण होऊन जीव गमवावा लागला आहे.

विधिज्ञातील सदस्यांचा थेट पक्षकारांशी संबंध येत असल्याने फ्रंटलाइन वर्कर म्हणून त्यांचे लसीकरण करून घ्यावे. अनेक ४५ वर्षे वयोगटाखालील वकिलांना कोरोना संसर्गाने जीव गमवावा लागला आहे. त्यांना २५ लाख रुपयांचे विमा कवच द्यावे.

- ॲड. नितीन भोसले, जिल्हा विधीज्ञ मंडळ, उस्मानाबाद.