परभणी ः जिल्ह्यात रविवारी (ता. २४) १४ रुग्णांच्या कोविड-१९ च्या चाचणीचा अहवाल पॉझिटिव्ह आला. आतापर्यंतचा हा सर्वाधिक आकडा आहे. रविवारी आलेल्या अहवालानुसार, गंगाखेडमध्ये अकरा, परभणीत दोन आणि सेलूत एकाला कोविड-१९ ची बाधा झाली आहे. त्यामुळे जिल्ह्याची आता एकूण रुग्णसंख्या ३६ वर पोचली आहे. 

जिंतूर तालुक्यातील सावंगी (भांबळे) येथील कोरोनाबाधित महिलेचा मृत्यू झाल्याच्या पार्श्‍वभूमीवर जिल्ह्यात मोठी खळबळ उडाली असताना रविवारी (ता. 24) रात्री कोरोनाबाधित रुग्णांच्या संख्येत नव्याने 14 वाढ झाली. रविवारी सकाळपासून शासकीय अधिकारी नांदेड येथील प्रयोगशाळेकडून कधी अहवाल प्राप्त होतो, या प्रतीक्षेत होते. रविवारी दिवसभरही अहवाल प्राप्त झाला नाही. रविवारी प्रलंबित स्वॅबची संख्या दोनशेंवर पोचली. या आठवड्यात कोरोनाबाधित रुग्णांची संख्येत दिवसेदिवस वाढ होत आहे. शुक्रवारी मध्यरात्री नांदेड येथील प्रयोगशाळेमार्फत प्राप्त अहवालानुसार सावंगी (भांबळे) येथील एक महिला व परभणीतील एका तरूणीचा स्वॅब कोरोना पॉझिटीव्ह आढळून आला. परिणामी, कोरोनाबाधित रुग्णांच्या संख्येत आणखीन दोनने वाढ झाली. ती संख्या 22 पर्यंत पोचली.

 कोरोनाबाधीताचे प्राण वाचविण्याची ‘त्रिसूत्री’; व्हेंटिलेटर गरज असेल तेव्हाच!

त्यातच सावंगी येथील संशयित महिलेचा शुक्रवारी सायंकाळी मृत्यू झाला अन् मध्यरात्री ती महिला कोरोना पॉझिटीव्ह असल्याचा अहवाल प्राप्त झाला. त्यामुळे शासकीय यंत्रणा खडबडून जागी झाली. जिल्ह्यातही प्रचंड अस्वस्थता पसरली. विशेषत म्हणजे कोरोनाबाधित सर्व रुग्ण हे परजिल्ह्यातून आपल्या मुळगावी म्हणजे परभणी जिल्ह्यात दाखल झालेले आहेत.