अंबाजोगाई : (बातमीदार) शहरातील एका पतसंस्थेच्या रोखपालास रस्त्यात अडवून तीन जणांनी पिस्तूलचा धाक दाखवत ३९ लाख रुपयाची बॅग लंपास केली. शुक्रवारी (ता.१६) रात्री साडेआठ वाजता ही घटना घडली.

घटनेची माहिती अशी, की येथील राजर्षी शाहू पतसंस्थेचे रोखपाल गणेश देशमुख हे शुक्रवारी रात्री आपले कामकाज आटोपून दिवसभरात जमा झालेली जवळपास ३९ लाख रुपयांची रक्कम सुरक्षित ठिकाणी ठेवण्यासाठी सेवकासोबत दुचाकीवरून निघाले होते.

ते मुकुंदराज कॉलनीत आले असता त्यांच्या पाळतीवर असलेल्या तीन चोरट्यांनी त्यांना रस्त्यातो अडविले व स्वतः जवळील पिस्तूल काढून त्यांनी ती देशमुख यांच्या डोक्याला लावली. पिस्तूल आणि त्यासोबत चाकूचा धाक दाखवत त्यांनी देशमुख यांच्याकडील रक्कम ठेवलेली बॅग घेतली आणि पसार झाले. घटनेची माहिती मिळताच पोलिसांनी घटनास्थळी भेट दिली असून पुढील तपास सुरू आहे. दरम्यान, भर वस्तीत घडलेल्या या घटनेने शहरात खळबळ उडाली आहे.