Jalna News : जीप (काळी-पिवळी) विहिरीत कोसळून सात जण ठार तर, सात जण जखमी झाल्याची घटना जालना-राजूर मार्गावरील तुपेवाडी शिवारात गुरुवारी (ता. १८) दुपारी साडेचारच्या सुमारास घडली. पंढरपूरहून परतलेल्या पाच जणांचा मृतांत समावेश आहे.

चणेगाव (ता. बदनापूर) येथील नऊ वारकरी पंढरपूरला पायी गेले होते. आषाढी एकादशीला विठ्ठलाचे दर्शन घेऊन गुरूवारी ते बसने जालन्यात दाखल झाले. जालना येथून गावी जाण्यासाठी काळीपिवळीतून ते राजूरकडे निघाले होते. तुपेवाडी शिवारात समोरून आलेल्या दुचाकीला वाचविण्याच्या प्रयत्नात चालकाचे नियंत्रण सुटले.

त्यामुळे रस्त्यापासून ५० ते ६० फुटांवर असलेल्या विहिरीत काळीपिवळी कोसळली. या अपघातात ताराबाई मालुसरे (वय ५५),  चंद्रकला घुगे (वय ५०), प्रल्हाद महाजन (वय ६०), प्रल्हाद बिटले (वय ७५), नारायण निहाळ (वय ४५), मंदा तायडे (वय ६५), आणि रंजना कांबळे (वय ४५) यांचा मृत्यू झाला.

विहीरीत कोसळलेली काळीपिवळी क्रेनच्या मदतीने बाहेर काढण्यात आली. बचाव कार्यासाठी जालन्यातील अग्निशमन दल दाखल झाले होते. विहिरीतील पाण्याचा उपसा करून जीपमधील प्रवाशांचा शोध घ्यावा लागला. जीपचालक बाबासाहेब हिवाळे यानेही अपघातानंतर दोन ते तीन जणांना बाहेर काढल्याचे पोलिसांकडून सांगण्यात आले.