लोकसभा निवडणुकांचे कल समोर येत आहेत. अशातच राज्याचे लक्ष लागलेल्या आणि तिहेरी लढत होत असलेल्या औरंगाबाद लोकसभा मतदारसंघात चुरस दिसून येत आहेत. महाविकास आघाडीचे चंद्रकांत खैरे. महायुतीचे संदीपान भुमरे आणि विद्यमान खासदार एमआयएमचे इम्तियाज जलील यांच्यात ही अटातटीची लढत पाहायला मिळत आहे.

सुरूवातीला समोर आलेल्या आकडेवारीनुसार, एमआयएमचे इम्तियाज जलील हे पहिल्या फेरी अखेर आघाडीवर दिसून आले होते. चंद्रकांत खैरे ११ हजार ४३४, संदिपान भुमरे १६ हजार ४०५ तर इम्तियाज जलील १९ हजार ७४५ अशी मते अपेक्षित होती. तर आता औरंगाबाद लोकसभा मतदारसंघाच्या तिसऱ्या फेरीत संदिपान भुमरे (शिवसेना - शिंदे गट) यांना २२८ मतांची आघाडी मिळाली आहे.

संदिपान भुमरे यांना - 50946 मते

इम्तियाज जलील - 50718 मते

चंद्रकांत खैरे - 35506 मते

तिसऱ्या फेरीमध्ये संदिपान भुमरे आणि इम्तियाज जलील यांच्यात काहीच मतांचं अंतर आहे तर चंद्रकांत खैरे पिछाडीवर गेले आहेत.

औरंगाबाद लोकसभा मतदारसंघाची मतमोजणी एमआयटी महाविद्यालय, बीड बायपास येथे सकाळी ८ वाजेपासून मतमोजणीला सुरुवात झाली आहे. मतदारसंघात सहा विधानसभा क्षेत्रांचा समावेश आहे. त्यात कन्नड, औरंगाबाद मध्य, औरंगाबाद पश्चिम, औरंगाबाद पूर्व, गंगापूर, वैजापूर असे सहा विधानसभा मतदारसंघ आहेत. प्रत्येक विधानसभा क्षेत्रातील मतांची मोजणी करण्यासाठी १४ टेबल लावले आहेत. ७ टेबलची एक रांग अशा दोन रांगावर मतमोजणी सुरू आहे.