औरंगाबाद : दुचाकीसाठी बँकेकडून घेतलेल्या कर्जाचे हप्ते चुकविण्यासाठी दुचाकीवर बनावट क्रमांक टाकून फिरणाऱ्या एकाला गुन्हे शाखेच्या पथकाने ताब्यात घेतले. ही कारवाई रविवारी दुपारी अडीचच्या सुमारास नारेगाव येथे करण्यात आली. मुश्ताक शेख जाफर शेख (५१, रा. पुकराज नगर, न्यू भोकरदन, जि. जालना) असे अटकेतील आरोपीचे नाव आहे.

गुन्हे शाखेचे पथक गस्तीवर असताना दुपारी अडीचच्या सुमारास नारेगाव येथील दर्गा मस्जिद जवळ संशयास्पद दुचाकीस्वार दिसला. त्याला थांबवून दुचाकीच्या कागदपत्रांची मागणी केली असता त्याने कागदपत्रे नसल्याचे सांगितले. पोलिसांनी त्याच्या दुचाकीच्या क्रमांकाची (एमएच- २०-सीसी-२५१८) ऑनलाइन पडताळणी केली असता तो दुसऱ्याच दुचाकीचा क्रमांक निघाला. त्यामुळे आरोपीच्या ताब्यातील दुचाकीच्या चेसीस व इंजिन क्रमांकांची पाहणी केली असता मूळ क्रमांक (एमएच-२०-सीएल ८२२२) असा असल्याचे समोर आले.

पोलिसांनी त्याकडे दुचाकीबाबत कसून चौकशी केली तेव्हा त्याने ही दुचाकी अबरार सरदार खान (रा. रोशनगेट) याच्याकडून घेतल्याचे सांगितले. या दुचाकीवर एचडीएफसी बँकेचे कर्ज असल्यामुळे त्याचे हप्ते चुकविण्यासाठी व बँकेने दुचाकी घेऊन जाऊ नये म्हणून बनावट क्रमांक टाकल्याची कबुली त्याने दिली. पोलिसांनी दुचाकीसह त्याला ताब्यात घेतले. ही कारवाई गुन्हे शाखेचे निरीक्षक अविनाश आघाव यांच्या मार्गदर्शनाखाली पोलिस उपनिरीक्षक दत्ता शेळके, किरण गावंडे, विठ्ठल सुरे, ओमप्रकाश बनकर, नवनाथ खांडेकर, संजय राजपूत, जितेंद्र ठाकूर, रमेश गायकवाड यांनी केली.