औरंगाबाद : एसटी कर्मचाऱ्यांच्या संपाच्या अनुषंगाने शासनाने खासगी वाहतूकदारांना परवानगी दिलेली आहे. त्यामुळेच बिनधास्त झालेल्या खासगी वाहतूकदारांकडून मनमानी आणि बेशिस्तपणा करण्यात येत असल्याने सामान्य नागरीक त्रस्त झाले आहेत.

खासगी वाहतूकदारांनी एसटी भाड्यापेक्षा अधिक किंवा मनमानी पद्धतीने भाडे आकारु नये, असे आरटीओ कार्यालय सांगत असले तरीही खासगी वाहतूकदार ऐकण्यास तयार नाहीत. यासंदर्भात ठोस कारवाई केली जात नाही. प्रवाशांची गैरसोय होऊ नये म्हणून आरटीओ आणि पोलिसांकडून काहीशी ढील दिली जात असल्याने खासगी वाहतूकदार गैरफायदा घेऊन मनमानी करीत आहेत. सिडकोच्या वसंतराव नाईक चौक आणि महाविर चौक (बाबा पेट्रोल पंप), हर्सूल टी पॉइंट, चिकलठाणा या ठिकाणी खासगी वाहतूकदारांचा बेशिस्तपणा दिसत आहे. प्रवाशी वाहतूक करणाऱ्या रिक्षा, काळीपिवळी, खासगी जीप, मिनीबस, स्कूल बस असा वाहनांचा अक्षरशः धुमाकूळ असल्याचे चित्र आहे.

रस्त्यांच्या मधोमध वाहतूकीचा विचार न करात प्रवाशांच्या हाताला धरून वाहनात बसवण्याची स्पर्धाच या चौकांमध्ये दिवसभर सुरु असते. प्रवाशांकडू मनमानी पद्धतीने भाडे आकारणी केली जात आहे. मात्र सध्या प्रवाशांना दुसरा पर्याय नसल्याने निमुटपणे अधिक भाडे दिल्याशिवाय प्रवाशांना पर्याय राहिलेला नाही.

पोलिसांच्या साक्षीने प्रकार

चौकाचौकात खाजगी वाहतूकदारांचा अक्षरशः धुमाकूळ सुरु आहे. विशेष म्हणजे, प्रत्येक चौकात पोलिस उभे आहेत. तर आरटीओचे पथकही सोयीनुसार चक्कर मारत आहे. असे असतानाही खासगी वाहतूकदार ऐकण्यास तयार नाहीत, चौकांमध्ये रस्त्यावरी दुसऱ्या वाहनांचा आणि वाहतूकीचा विचार न करता वाहने उभी केली जातात. त्यामुळे नागरीक आणि प्रवाशी त्रस्त झाले आहेत.